Norman Arends di Safari Tours ta haci un apelacion na propietario di e tereno na Andicuri cu a blokea recientemente, pa yega na un solucion temporal pa nan por sigui haci uzo di e caminda aki.
Arends a splica cu nan ta organisa diferente tour, manera di buceo pa mira e rifnan y e area eytras tin un di e “site”nan mas bunita y mas barata pa e turista. Awo cu e entrada pa e boca a wordo blokea, e tin miedo cu si e mester bay uza un caminda mas offroad, e ta trece mas gasto pa desgaste di e vehiculonan pa cual e lo mester subi e tarifa. Y esaki ta dificil pa haci den e temponan aki, cu tin masha poco turista yegando Aruba,
Banda di esaki, e area ey tras tambe ta atractivo pa “hunters” di Lionfish, cu ta daña bida marino. Y no ta solamente su so, sino mas hende, pero cu e cierre di e entrada pa e boca, hopi hende lo no bay eynan pa evita di laga nan auto leu cu tur e consecuencia cu nan por bira victima di delincuentenan.
Anteriormente e doño di e tereno propiedad a splica cu tin hopi daño causa na naturalesa y e kier evita cu esaki ta sigui sosode si laga vehiculonan sigui pasa. E no tin ningun problema pa e hendenan cana riba su propiedad pa yega ten a e lama pero e kier evita vehiculonan.
Arends a haci un suplica na e propietario, pasobra e no sa kende e ta y e sa cu e ta den tur su derecho, pa tuma contacto cu ne pa nan por sinta na mesa y yega na un solucion temporal. Kisas te ora cu Gobierno traha un ruta alternativa cu ta mas cerca pa nan cu esun via di Santa Lucia.
El a bisa cu cera e caminda net den e temporada aki ta haci nan situacion hopi mas dificil pa cgana nan pan.
