Ayera tabatin baratiyo di Black Friday tur caminda. Clientenan a yega na diferente establecimento pa probecha di prijsnan di baratio cu tiendanan a ofrece for di mainta trempan. Jonathan Wever, Marketing Manager di Sport Caribe y Adidas Aruba a conta cu e aña aki tabata hopi similar na aña pasa. Por a ripara e aña aki, mas cu nunca, hopi comerciante a participa, haciendo cu hopi hende a aglomera den caya grandi.

Pa loke ta Sport Caribe, nan a experencie hopi bon. Nan tabatin un fila masha largo mes y mirando e exito di aña pasa, nan a haci’e den ambos tienda. Ainda pa 6’or di atardi tabatin hende canando den caya, mayoria tienda a extende e benta aki pa awe, diasabra. Hopi comerciante a probecha di Black Friday Sale moment. 

Comercio ta hopi satisfecho cu “Black Friday 2019”

Comercio ta hopi satisfecho cu “Black Friday 2019” . Click e link pa mas https://24ora.tv/2OYVRf9

Posted by 24ora on Saturday, November 30, 2019

Preparacion

E preparacionnan ta poco exhausto. Wever a comenta cu ta bon ora tin mas comerciante ta participa den e parti general. Pero claramente como un comerciante, bo kier sobresali contra e otro comerciantenan. Esaki ta nifica cu cada un mester inverti den nan propio zonido, pone nan propio banderanan. Esaki ta inclui un plan di mercadeo unda cu ta cuminsa varios dia di antemano caba haciendo uzo di media.

Asina ey ta logra haya cu clientenan sa cu tin “sale”. Den e mundo di awendia tin tanto propaganda eyfo, cu bo ta perde. Tin cu haci lo maximo pa por sobresali. 

Obviamente cu ta un Black Friday cual ta un diabierna, pero e no ta un dia festivo. Hende tin cu traha, tin cu bay scol. Esey ta haci cu di parti mainta, no tin mesun hopi movecion spera si haci’e manera riba un diasabra of un dia festivo, manera por ehempel Dia di Betico. Pero si e ta percura, mirando e circunstancianan tin hopi hende toch riba pia.

Un exito

Francis Gil, director di e tiendanan di Athlete’s Foot, a comenta cu e dia a cuminsa bon y hopi hende riba caya. Danki na Dios cu hopi hende no a warda henter dia pa shop. Nan a cuminsa for di mainta tempran. Y esunnan cu no tabata por mainta tempran, den oranan di atardi a sinti flow. E tabata un dia cu hopi fluho. Athlete’s Foot den caya mes tabata hopi druk, pero all-in-all tabata un dia bon.

Black Friday

Segun Gil ta un preparacion cu ta bin for di hopi tempo caba. Tur hende ta spera pa anuncia kico bo ta bay duna di descuento y esey na ultimo ora ta anuncia. Preparacionnan semper tin cun’e. Tin di laga los di cierto productonan pa awor aki e producto nobo bin pa asina ofrece nan den e dianan di fiesta.

Descuentonan

Gil a comenta cu semper tin e retonan, kico bo ta bay pone, cua mercancia ta bay na descuento. Pero tin añanan di experiencia caba cu ta mira kico tur mester bay. Tin mercancia cu tin di bay riba 70%. Tin mercancia cu ta nobo, pero tin di wak e margennan. Ta un challenge. Te cu diahuebs ainda Gil tabata kibrando su cabes riba dje. E dia a bay bon. Tin cierto momento tin di laga bay y duna e pueblo tambe bek. E ta mas manera un gesto pa duna bek e dia na su clientenan.

Añanan di experiencia

Gil a analisa e dia. Te cu 6’or e tabata OK y un tienda menos. Den oranan di anochi e ta sigui cu Paseo Herencia te cu 10’or. El a sigui cu su benta na Paseo y pa mira con e resto di anochi ta caba. Ta spera cu e publico por sostene comercio den caya, pa loke ta “shop local”, wak kico tin den caya, wak kico tin den e area, pa por cumpra pa regala pa Pasco y tambe pa aña nobo.

Comments

comments