“Bishita di Prome Minister di Aruba siman pasa na Den Haag, no tabata un bishita pa sirbi interes general di pueblo di Aruba pero mas tanto pa evita cu e y su gobierno ta haya un aanwijzing (KB) pa nan mal maneho.” Lider di AVP, mr Mike Eman a declara esey y a mustra cu ta prome biaha den historia di pais Aruba, c’un Prome Minister ta biaha pa Hulanda pa busca un “prijntje” y un “stempel” pa evita un “aanwijzing” (=KB). E no a bay pa papia riba con ta mehora e situacion na Aruba, manera Mike Eman a haci durante di gobernacion di AVP. Mike Eman: “E no a bay pa splica gobierno Hulandes cu no mester tuma mas medida, pero mester inverti, pone economia crece, duna hende trabou y mehora nan forsa di compra. No! Prome Minister Wever Croes a bay papia riba medidanan cu e ta bay introduci pa sigui castiga pueblo manera cu su gobierno a bin ta haci e ultimo dos añanan. Ela bay Hulanda pa bisa con e ta bay tuma mas medida pa por cumpli cu e exigencianan di Hulanda, sin splica nan ta ki problema y ki dolor e medidanan ta causa nos pais, nos economia y nos hendenan.”

NAN NO A SCIRBI’E PE, NAN A BIS’E

Mike Eman: “Ora bo scucha declaracionnan cu a sali for di Hulanda, ta hopi cla cu loke nos tin riba mesa ta un ‘mondelinge aanwijzing’  y esaki no a wordo poni riba papel, nan no a scirbi’e pe, pero simplemente sr Knops a bis’e verbalmente, kico e tin cu haci pa percura cu presupuesto 2020 tin e elementonan den dje cu Hulanda kier wak. Nan a bis’e mescos cu e lo a wordo poni riba papel. Y Prome Minister a sacudi cabes y bisa ‘Ja Meneer’.”  Cu otro palabra, e no a ni sikiera para pa e interes di pueblo di Aruba. 

MODELO BIEUW DI MEDIDA

Algo cu ta haci hopi dolor pa henter nos comunidad, ta cu gobierno di MEP POR y RED ta aplica e mes un modelo bieuw cu MEP a usa mas cu 10 aña pasa pa yega na e normanan di presupuesto. Pueblo a rechasa e modelo ey na 2009 caba. E gobierno actual a bolbe trece bek. E normanan cu gobierno actual mester cumpli cun’e ta e mes un normanan cu gobierno di AVP tambe a acorda den e protocol e tempo aya. Parlamento a pasa e ley di CFT y gobierno di AVP a reduci e dificit enormemente. Pero tin un diferencia grandi den e forma cu AVP a maneha e asunto aki, cu e forma con e gobierno actual ta acerca henter e reto di reduci dificit. Mike Eman: “Nos a reduci e deficit di 9% te na 2%, mientras cu na mes un momento nos a percura pa gobierno tin entrada, mehora forsa di compra di nos famianan trahador y duna ciudadanonan un miho perspectiva pa futuro. Con nos a haci’e. Door di inverti pa crece. Ora tin crecemento economico e ta crea trabou y entrada pa famianan cu ta wak e ora cu nan poder di compra ta mehora y gobierno ta haya mas entrada tambe. Pueblo a wak y te awe ta wak e resultado di e inversionnan cu AVP a haci cu placa di pueblo, pa pais y pueblo. Loke awe pueblo ta mira ta cu e gobierno di MEP POR y RED ta impone medida so. Niun inversion y niun perspectiva pa mehoracion. Djies medida tras medida, sin niun beneficio pa pueblo.”

Comments

comments