Un reunion poni riba agenda di parlamento pa awe mainta 10:00 no a sigui. E motibo tabata falta di quorum. Mester señala cu coalicion ta esun cu mester percura pa tin quorum cu nan reunion por sigui. E tema cu mester a trata tabata e presupuesto di Tourism Product Enhancement Fund
A toca himno di Aruba pa despues Presidente di Parlamento mr. Edgard Vrolijk cuminsa cu e reunion. Pero el a nota e momento ey cu no tin quorum mientras cu parlamentario Hendrik Tevreden a pidi un punto di ordo. El a expresa cu tin hende a firma lista di orado pero e momento ey nan no ta sinta den sala.
E tabata kier sa si e parlamentarionan ey, cu no ta forma parti di e coalicion, lo drenta paden pa duna apoyo pa e reunion sigui. “Ta nan deber pa cumpli cu nan trabou y forma quorum,” el a bisa.
“Cada ken ta hende grandi y mester cumpli cu nan responsabilidad. Ami mester cumpli cu e Reglamento di Ordo … e ta keda na nan discrecion.”
Parlamentario di Raiz, Raymond Kamperveen tampoco no a gusta cu oposicion no a saca un man pa reunion di Tourism Product Enhancement Fund por a sigui. A menciona cu e falta di cooperacion pa presenta na un reunion manera esun di diamars mainta mester cay bou di “No work no pay”. “Bo no por ta wordo paga door di pueblo y bo no ta presenta. Of ta presenta y keda pafo di sala, mientras cu esaki ta un trabou cu bo mester representa pueblo.”
El a expresa cu e ta lamenta cu e sistema aki di politica tradicional ta sigui. “Ta mira diferente colega canando rond.”
Despues Vrolijk a repasa lista. Aki a constata cu Alvin Molina y Misha Raymond a informa cu nan lo ta ausente awe mientras cu Santos do Nascimento ta malo y Miguel Mansur ta den exterior pa un control medico.
Mirando cu tin solamente 9 parlamentario presente, cu no ta forma quorum, “mi ta schors e reunion tot nadere orde”, e presidente a bisa.
