Despues cu e reunion pa presupuesto di Tourism Product Enhancement Fund (TPEF) no a sigui, e parlamentarionan di AVP Arthur Dowers y Mervin Wyatt Ras a tene un conferencia di prensa, unda ambos a baha pisa riba e coalicion MEP/Raiz.
“E sucedido no ta un sorpresa si mira cu parlamento ultimo añanan a bira manera un “poppenkast”. Awe a yega e toppunt di groseria. Tin un grupo di persona cu ta sostene un gobierno, cu no ta respeta regla ni ley of persona, y awo ta spera y exigi pa otro miembronan di parlamento, cu no ta di coalicion, mester bin sinta y tuma nan insultonan,” esaki Dowers a trece su dilanti. E tabata reacciona riba tanto Hendrik Tevreden como Raymond Kamperveen cu a cuestiona ausencia di oposicion den parlamento.
El a agrega cu nos ta bibando den un estado democratico, unda tur hende mester mantene nan mes na regla y ordonan. Den pasado tabatin hende cu a yuda e coalicion haya quorum pa despues e minister bin insulta.
“Boso tin 11 miembro, si no tin 11 bay gobernador y entrega bo gobierno. Si bo tin 11, anto percura pa nan tur ta sinta paden 24-7 pa percura cu ta pasa loke bo kier pa pasa y sostene bo bagamunderianan. Nos no a bin den parlamento pa sostene porkeria ni sostene abuso contra pueblo. Si tin hendenan cu ta obliga pa haci’e, anos no t’ey pa apoya nan den esey. Nos t’ey pa vigila trabou di gobierno y nos no mester ta sinta eyden pa haci esey pa duna nan quorum pa nan reunionnan. Vrolijk mester tabata sa di antemano cu si bo no tin e diesun miembronan pa sostene, no mester a yama e reunion. Of mester a schors e reunion prome cu a habri’e. Awo mester a habri y constata cu gobierno di Aruba no tin apoyo di parlamento pa pasa un ley.”
El a bisa Minister Oduber bon cla cu Nel Oduber nunca lo a permiti un situacion yega asina leu pasobra esnan cu ta di coalicion mester percura pa tin suficiente hende den sala. “Esaki ta un les pa MEP cu si kier goberna cu partido chikito, anto mester siña cu ta yega momento cu partido chikito ta dicidi kico mester pasa.
