Complace cu hende y lubida riba Dios ta masha facil, tene hende contento y pone palabra di Dios un banda ta sosode tur caminda. Apoya maldad y lubida temor di Dios ta wega, pero hopi hende ta lubida cu Dios ta mira tur cos, hasta e cosnan cu hende ta kere ta scondi.
Ta masha nechi pa nos ta preocupa pa keda bon cu hende, pero con nos ta para cu Dios, pasobra Dios no ta wak apariencia. Dios ta wak curason. Dios no tin cuenta cu rasa, color of cabey, of bon bisti, of mal bisti, pero ta nos curason ta identifica nos dilanti di Dios.
Agrada hende ta un placer, pero agrada Dios ta un deber,pa un hende sigi Señor e mester nenga su mes hisa su cruz y sigui Señor.
Awor no ta tur hende cu kier sigi Señor kier nenga nan mes, p’esey bo ta haya hopi ta cana den dos caminda, un rato cu Dios, y un rato den e mundo. Hopi biaha tipo di bida asina ta manera un kelder den santana cu pafo ta mustra bunita, blanco di verf, of fura tur na marmer, pero paden ta yen di weso putri.( Mateo 23:28). Asina boso tambe di pafo ta parce husto na hende, ma di paden boso ta yen di hipocresia y inikinidad.
Nos tur a wordo crea den imagen y semehansa di Señor esey ta nifica cu nos tur por ta un instrumento di honor den man di Señor. Pasobra cerca Señor no tin ser humano di segunda clase y e unico cos cu ta separa nos for di Dios ta pica, p’esey e palabra di Dios ta siña nos den 1 Huan 1;9 bisando; Si nos confesa nos picanan, Dios ta fiel y husto di pordona nos, nos picanan y libra nos di tur inhusticia.
Pa nos nenga nos mes, nos tin stop di haci e cosnan cu nos sa cu ta complace cu nos carni, pero no ta agrada Dios.
Y e cruz cu nos tin di hisa ta nos deber di sirbi Dios y tambe ta deber di ta responsabel pa nos famia.
Ora nos carni ta bisa nos pa:
Bebe, droga, parandia, comete adulterio, inmoralidad, abominacion, pleita, violencia, rabia, odio, falta di pordon, abuso, abandono di hogar, amargura etc.
Nos deber cu Dios y nos famia ta bisa nos:
Cuida bo cas, Stima bo esposa/esposo, stima bo yiunan, paga bo huur, bo utilidadnan y no bay gamble e placa. Bo no por tin mas muhe hunto cu bo casa, no sinta bebe tur bo placa cu amigonan y laga bo yiunan sin cuminda y den scuridad.
Ora bo nenga bo mes y coy bo cruz y sigui Cristo Hesus, tur hende lo conoce bo na bo frutanan, pasobra e luz di Dios lo ta riba bo constantemente, y den tur locual cu bo haci lo bo mira progreso.
Isaias 43:4 : Pasobra bo ta precioso den Mi bista, pasobra bo ta honra, y Mi ta stima bo.
Ta masha importante ora nos ta biba pa Dios, ora nos tin Cristo Hesus na prome lugar den nos bida , hogar y famia, pasobra E ta nos defensa, nos pronto auxilio, den tur tempo.
Laga e pas di Cristo goberna den boso curason. Laga e palabra di Cristo biba ricamente den boso,cu tur sabiduria. Y tur loke boso haci di palabra of cu hecho, haci tur den e nomber di Señor Hesus, dunando gradicimento door di dj’E na Dios e tata.(Colosensenan 3:15-17)
Abstene di tur forma di maldad. (1 Thesalonisensenan 5:22).
Mantene temor di Dios.
