Diabierna a inicia e Artistic Gymnastics Camp bao direccion di coach olimpico internacional Yin Alvarez y Federacion Gymnastico Arubano. Milly Bagheri, presidente di e federacion ta conta cu nan ta hopi contento di por a atrae un coach olimpico cu a logra hiba shete atleta na olimpiada. E ta hopi conoci rond mundo y ta un coach cu ta pasa su tempo ta duna campamento y entrena ekiponan di diferente pais. FGA a tuma contacto cu ne luna pasa kende pa sorpresa a laga sa cu e tabata tin un siman cu e por a bin Aruba.
“Nos naturalmente a probecha di e oportunidad aki pasobra nos ta spera di por hay’e pa otro aña pasobra su agenda ta yen, pero nos a logra trece awo. Nos a regla pa e bini y core yama tur nos clubnan pa trece nan miho atletanan di nivel pa asina por sigui avansa nan nivel di cada club hunto cu nan coach.”
Yin Alvarez como coach tin bon resultado mundial cu medaya olimpico pa varios atleta anto a introduci varios atleta na ekipo nacional Americano hubenil y adulto. Su atletanan a participa den pan americano y tambe a yuda hopi atleta den hopi pais rond mundo. Nicole Hoevertsz, secretario general di Comite Olimpico Arubano ta enfatisa cu FGA ta haciendo varios actividad na diferente manera y angulo pa percura cu e deporte ta fortifica pa e atletanan por expone nan mes na expertonan internacional. “Di e forma ey nan ta siña cosnan nobo y esey ta bon pa Aruba, pa nan, pa e clubnan y finalmente sigur pa Comite Olimpico Arubano tambe,” Hoevertsz ta comenta.
Den tur manera FGA ta purba di eleva e nivel di gymnasia na Aruba, di e atletanan manera tambe e coachnan. Coach Alvarez tin e disponibilidad pa sigui guia nan. E ta papia porta den haci evaluacion virtual di Aruba su atletanan, pa asina keda den contacto cu e federacion a pesar di por ta hopi leu for di otro. “Awendia cu tur loke nos por haci virtual ta haci e hopi bon pa por tin un coach internacional cu ta guia bo aunke cu e no ta presente fisicamente,” segun Bagheri. E atletanan lo ta bezig cu e camp aki te cu otro siman.
