E famoso Fiesta Rotaria ta tumando luga actualmente riba e parkeerplaats di Compleho Deportivo Guillermo Prospero Trinidad.
Rotary International a haya masha hopi cooperacion di supermercadonan. Ta papia aki di comestibles cu tin na benta na entre otro e tent di supermercado cu ta masha popular durante Fiesta Rotaria.
No mester cana cu placa efectivo pasobra tin sistema cu por swipe bo pago. No ta solamente e seccion di supermercado tin, pero aparato electronico, muebles, seccion pa mucha, libreria, musica, etc. Pero no por lubida e famoso rifa cu e maximo premio ta un Chevrolet 2024 completamente nobo. E ta un di e diescuater premionan. Pa solamente 25 florin, por gana un di e premionan aki.
Durante henter dia lo tin musica y show pa famia pasa un dia agradabel haciendo nan compras y yuda pa Rotary International por sigui yuda diferente instancia den comunidad cu semper mester di ayudo. Ta papia aki di fundacionnan cu ta traha na bienestar na comunidad.
Tin chens pa haci compras na Fiesta Rotaria te cu 6:00 PM. Por cumpra e rifa te 4:30 PM.
Un dia prome rond di 200 boluntario a yuda prepara tur cos pa ora cu porta a habri awe mainta 9:00 am tur cos ta cla pa e cliente cumpra.
