Poco poco e ambiente di Olde Molen ta bay disparce pa un otro tipo di ambiente cu ta bezig cun’e. Oldric Fernandes, propietario di e establecimento, a comenta cu nan a papia cu Gobierno debi cu nan kier bin cu un otro maneho, un otro tipo di negoshi. Nan ta trahando riba un plan pa bini cu un Boutique Hotel.
Unda a cana
Awor aki nan ta canando nan camindanan legal, manera cu mester ta. Ya practicamente Gobierno sa caba loke nan kier bin cun’e.
Unda e idea a nace
E idea aki a nace entre Fernandes cu su tata mes, kende ta un arkitecto hopi conoci na Aruba. Fernandes mes tambe ta un arkitecto y hunto nan ta planificando e concepto di Molen, pasobra nan kier keda cun’e. Si otro hende keda cu Molen, nan ta bash’e abao Molen y e ta forma parti di historia di Aruba.
Nan ta canando cu e idea ak probablemente pa dos aña caba. Tur cos ta tuma su tempo. Ta un proceso caminda cu tin cu cana e caminda legal.
Boutique Hotel
E zona cu Olde Molen ta awor aki, ta e zona perfecto. E Boutique Hotel ta consisti di mas of menos 100 camber, segun Fernandes. Pa loke ta financiamento, tin combersacion riba esaki. Mester tin cierto rekisitonan legal na ordo, djey ta sigui.
E nomber ta bay ta Olde Molen Boutique Hotel. Awor aki ta bezig te ainda cu e permisonan. Asina cu nan keda cla cu tur e documentonan legal, e ora por sinta na mesa cu e inversionistanan pa asina por sigui cu e proyecto.
Grupo
Mester tin un cadena pa por maneha e hotel, segun Fernandes. E proceso por dura largo, aunke cu no ta descarta cu e por dura poco tempo toch, pa yega caminda cu e ta. Pa loke ta e nightclub, e maneho di Gobierno anterior tabata kier a cambia e sistema di orario pa e club nocturno. Esey ta bay afecta e negoshi. E ora mester busca un otro alternativa, segun Fernandes.
Por ultimo el a menciona cu e idea ta pa wanta un rato cu e cambio di orario, te ora cu yega asina leu cu e hotel, e ora den futuro e club nocturno lo disparce por completo.
