Gabinte Wever Croes a bisa di lo pone e ser humano central y di lo pone atencion na necesidadnan real di nos comunidad. Durante periodo di campaña, bishitando casnan na Washington un di e preocupacionan grandi tabata e hecho cu no a asfalta hopi caminda y e molester di stof ta hopi grandi. Tin un scol basico y un scol primario den e vecindario y tin un volumen grandi di trafico den e area aki diariamente.
“Na momento nos a drenta gobierno mi a haci un peticion na colega Minister di infrastructura Otmar Oduber pa pone e careteranan di Washington riba e lista di camindanan cu mester wordo asfalta”, asina Minister Dangui Oduber a bisa awe mainta. “Mi ta contento y agradecido na e coperacion brinda di colega minister Otmar Oduber pa percura pa e trabounan pa asfalta henter e bario cuminsa dialuna 8 juli 2019. Un politico mester bisa den campaña loke e ta bai haci den gobierno y ora e ta den gobierno haci loke e la bisa e ta bai haci. Nos a haci e promesa na Washington cu nos lo percura pa pone asfalt y awe nos ta cumpli cu esaki tambe”.
Minister Dangui Oduber a sigui bisa cu ta dunando e districto di Noord hopi atencion den mehoracion di Infrastructura. Di e forma aki a inverti pa construccion di un Boardwalk na Malmok pa localnan y turistanan por haci ehercisio na un manera sigur. A percura pa asfalta diferente caya na Alto Vista. Na mes momento a drecha tur e stashinan rond di kapel di Alto Vista y actualmente lo cuminsa cu e camindanan na Washington.
”Nos ta un gobierno cu ta traha na bienestar di nos hendenan y esaki ta wordo demostra na decisionnan cu nos ta tuma”.
