Sue-Ann Ras ta bandona Parlamento despues di incidente cu Netflix

Algo mas di 1 aña pasa e a huramenta como Parlamentario di pais Aruba den Fraccion di MEP den Parlamento. Su enfoke tabata hopi riba enseñansa, muchanan y hende muhe.

Sinembargo, un blunder personal di bay mira pelicula via Netflix durante un bishita di trabou na Eerste Kamer na Hulanda, awe ta cost’e su integridad, pa cual el a opta pa tuma su retiro. E ta pone su asiento na disposicion di partido pa nan mes dicidi ken ta drenta na su luga.

“Mi sa cu mi no a haci nada ilegal, mi no a horta”, asina e Parlamentario a duna di conoce den un video cu el a graba pa anuncia su retiro. El a sigura cu den bida cada individuo mester asumi su responsabilidad pa su actonan y esey ta precisamente locual e ta haciendo aki tambe.

 

Ras tabata blanco di critica no solamente na Aruba pero den prensa na Hulanda y na Corsou, unda a sigui e eror aki masha di cerca. Mas cu djis e eror, e entrevista cu el a duna despues na prensa Hulandes a haci mas daño ainda na henter Parlamento di Aruba, cu e hecho cometi mes. Sue-Ann Ras mes a sinti cu e no lo por sigui funciona normal mas sin cu tur hende lo sigui confront’e cu e asunto di netflix na Hulanda.

Sue-Ann Ras ta un docente y a bin for di enseñansa. No ta conoci si e lo regresa atrobe den e mesun ramo for di unda el a bin.

Den bida nan ta bisa cu Dios ta pone situacionnan bo dilanti y ta wak con ta atende cu nan. E ta test bo fe, bo perseverancia y bo determinacion. Y mas cu tur cos bo caracter. Y recientemente esey tabata e caso cumi tambe.

Pa aworaki e incidente famoso cu a pasa cumi na Hulanda, tabata uno fastioso y hopi bergonsoso. El a crea un momento sumamente incomodo, no solamente pami, sino mi famia, como tambe pa e partido. Y mas leu ainda, esnan cu ta conta y a pone nan confiansa den mi, esta mi sostenedornan. Yam’e con cu bo kier, pero e tabata un acto y decision di mi, cu mi no ta bay hustifica y cu a hincami den un situacion asina.

Mi a haci algo sin pensa y awo mi tin cu carga e consecuencianan y e responsabilidad. Pa esaki mi ta pidi mi mas sincero despensa di curason. Bida a siñami un biaha mas cu loke bo  construi positivamente den un periodo largo, un carera hoben den politica, por keda destrui cu un solo acto di apenas algun di minuut.

E comentarionan a plama hopi lihe. Pero atrobe, mi ta compronde. Mi tin cu biba cu esey y mi sa cu mi a comete un eror barbaro. Mi sa cu e no lo drecha e fayo cometi y cu cada pensa con, kico y dicon ta condenami. Loke ami si por bisa awor ta, cu spera cu mi eror por sirbi como un wake up call pa tur hende y tambe sirbi como un norma di con un hende den e funcion aki tin cu actua den futuro ora cu e comete un fayo.

Pa con chikito cu e por ta, te na esun mas grandi. Esaki sigur no ta e manera cu mi a visualisa mi carera politico cortico di finalisa. Pero e eror aki ta recordami tambe cu no ta tur cos ta bay manera mi lo desea pa e bay. Y p’esey, despues di a consulta primeramente cu mi mes, despues cu mi famia y partido, mi dicidi cu e miho decision ta pa entrega mi asiento bek como parlamentario y pone na disposicion di partido MEP.

Mi sa cu mi no a comete nada ilegal. Mi no a horta y como tal, mi mester por hala esaki un banda y sigui p’adilanti. Sinembargo mi no lo ta comodo cu esey mas. Mi ta spera un biaha mas cu esnan cu mi haci dolor, rabia of a decepciona cu e acto iresponsabel aki, por pordonami.

Esey ta bay pa mi famia, mi partido y mi siguidornan. Tene esaki bon cla si. Mi por ta retirando di politica, pero mi lo sigui vigila y unda cu por sigui aporta cu mi granito di arena, sigur pa mehoracion di enseñansa y tambe social.

Lastimamente mi no a logra caba tur mi trabaonan den Parlamento, pero lo haci tur mi intento pa sigui di pafo.

Finalmente mi kier a pidi tur pa respeta mi decision, respeta mi privacidad y compronde cu mi lo kier lag’e te aki y cera e capitulo aki.

Pa cualkier pregunta, mi ta dirigi boso na partido. Masha danki pa boso atecion y un feliz dia yen di bendicion.