Lider di Accion21 a compara e cantidad di voto cu tur partido chikito a haya hunto. Pero e mes ta insulta nan door di yama nan “fly by night.” AVP ta e partido cu a sa di hiba Aruba den un direccion compara cu e otronan.
Clifford Heyliger (AVP) a expresa cu su persona no ta un free agent, pasobra e tin compromiso cu partido. E no a haya ningun oferta y no kier haya tampoco. Na 2021 el a tuma su decision, di cual e tin su meta y esey no a cambia. Su meta ta pa sirbi Aruba, y el a scoge e partido cu tin un track record. El a scoge un partido cu a pone Aruba riba un direccion, Aruba ontrack, pero awo ta mira un Aruba cu ta ditrack. Esaki ta bini pa motibo cu no tin vision, direccion ni nada pa pueblo. Ta mira cu tin un pueblo ta sufriendo.
Segun Heyliger, Miguel Mansur di Accion21 a papia riba un par di tema. Un di e temanan cu a pone Heyliger bay den politica ta e Landenpakket, e parti cu ta bay tin efecto riba e trahadonan. E supuesto cambio di ley laboral, e supuesto modernisacion. E sa cu esey no ta modernisacion, pasobra simplemente ta djis cambia algo esey no kiermen ta hacie moderno. Loke nan ta haci ta bay castiga e trahadonan, el a expresa.
Un otro cos ta cu ta depende hopi di Hulanda. E kier sa si no tin confiansa den profesional di aki, si tin confiansa den “nos hendenan.” El a expresa cu ta “nos hendenan” a trece “nos unda nos ta.” Diferente partido politico a yuda. Partido AVP tin un track record den e parti di Status Aparte. Tin hende a lucha, e antepasadonan, pero ainda tin hende ta lucha. Ainda ta kere cu como Rubiano, ainda por dicidi riba “nos mes.” Mas cu claro tin cos pa drecha cu no ta bon, ningun hende no ta nenga. Pero, ta pone tur cos y bisa cu Hulanda mester drecha, su persona no ta di acuerdo.
Landenpakket
E ta cuestiona e echo cu si ningun Rubiano no por rond un negoshi, ningun Rubiano por tin un funcion den gobierno of cualkier institucion halto na Aruba. Ni pa haci trabou social, pasobra aparentemente Rubiano no ta sirbi. Esey ta algo cu Heyliger ta sinti ora e tende tur hende brasa e Landenpakket. AVP ta e unico partido cu a bay eleccion y bisa di ta contra.
Heyliger a expresa cu nan no ta contra cierto reforma, pasobra nan sa cu tin di tuma luga. Loke nan ta contra ta cu tur cos ta preto cu blanco, esaki no ta sirbi. E dos partidonan grandi cu a daña e economia. Pero esey no ta berdad, el a expresa.
Tin partido cu desempleo a aumenta despues di ceramento di refineria, pero AVP a trece turismo bek. AVP a subi turismo n’e nivel cu e ta awe. E fundeshi pa por tin un economia por a bons bek, ta pasobra tur cos haci den pasado ta e mesun politiconan cu nan ta criticando.
Sinta cu sindicato
E landenpakket, BBO na frontera, e ta puntra si a papia cu e sindicatonan. Heyliger tabata sindicalista y a participa den dialogo social riba diferente tema. E sa cu e no ta facil. Ta sinta cu diferente grupo, hende y cada un tin interes propio. Pero ta sinta papia te ora yega un consenso.
Como sindicalista ta representa e trahadonan. Rond di 70 mil hende na Aruba ta haya representacion den decision cu ta tuma p’e nacion. Cada cuater aña tin eleccion, pero ta mir’e awo cu unabes nan sinta den Cocolishi of parlamento, ta lubida ken a vota pa nan. Nan no ta interesa den bienestar di pueblo, bienestar di e trahado. Tur a pensa cu nan ta bon para y bon sinta, bisti dashi y bachi, y mira con pa disfruta di bida. Pero cos no ta asina pa motibo cu e responsabilidad no ta caba ora di ta eligi. E momento ey peso ta cuminsa.
Ta sinta dialoga unda tur gremio, NGO, sindicato ta haya un chens di sinta y trece dilanti nan punto. Pero den e ultimo shete añanan por a mira cu tur esey a keda atras.
Fly by night
Pa loke ta trata e desaroyonan, segun Heyliger, esakinan ta preocupante. Hopi cu a spera di tabata diferente, no a resulta. El a recorda tempo di partido RED y a spera cu e lo a haci diferencia. Tempo e partido tabata den oposicion, e tabata completamente diferente. RED a sinta cu MEP y e unico cos nan enfoke tabata e parti di marihuana.
A mira un RAIZ, unda a kere cu hoben y profesional, etc. lo haci un diferencia. Pero ta mira cu no tin nada. E politico no ta di acuerdo cu Mansur. E ta duna lider di partido rason riba e parti di “fly by night.” E partidonan chikito kier ta strongmen ora di drenta gobierno. Esaki ta bin pasobra e un tema ey cu tin peso pa nan, nan kier pusha. Pero e bienestar general di esey ta bay perdi.
Mansur a duna como ehempel Singapour. E ta papia di partido grandi, pero Mansur ta insulta e partidonan chikito door di yama nan “fly by night.”
