Gobierno ta sigui crea debe pa pais Aruba. Aruba su gobierno ta manera un bari sin bom. No tin placa pa yega gobierno. Nos grandinan tin cu lucha pa biba di un pensioen di biehes cu no ta yega y riba dje nan mester paga nan mesun remedinan mientras cu nos tin un gobierno no ta haci net nada pa crea un otro pilar economico.
Nos a lesa cu na luna di mei 2023 gobierno a fia 165 miyon florin na un interes di 6.5% pa 9 aña largo y ora e termino yega Aruba mester paga 265 miyon florin. Na luna di juni 2023 ta haci un otro prestamo di 160 miyon florin na un interes di 6.5% pa 13 aña largo cu lo sali pais Aruba un suma di 300 miyon florin. Ora e tempo yega pa paga e debenan aki, gobierno lo mester bay fia paso gobierno lo no tin placa pa paga e debe aki. Lo mester bay refinancia e debe aki. E aña aki so nos gobierno a fia 325 miyon florin. Gobierno ta creado un monster di debe. Ni cu BBO na frontera y pafo di frontera placa lo yega pa page debe.
Pueblo mester biba den miseria pa gobierno hiba un bida di luho. Danki Dios rond di mundo pueblonan a cuminsa harta di gobiernonan socialista/comunista. Paisnan manera Grecia, Italia, Spaña y Alemania a harta di partidonan socialista cu e unico cos cu nan ta haci ta malgasta placa di pueblo. Aki na Aruba pa 22 aña largo nos gobiernonan socialista a hinca Aruba den debe. Durante tratamento di presupuesto ta hunga cu cifra cu e unico intencion pa sigui gaña CAft. No ta CAft nan ta gaña sino e pueblo mientras ta sigui zink Aruba den e moeras di debe. Aruba no por paga su debe mas y lo bin cu mas medida pa kita e tiki cabey fini cu pueblo tin.
E metanan di desaroyo sostenibel ta hopi bunita riba papel pero den practica el a fracasa. Hulanda su cuminda comunitario a subi for di aña pasa di1 miyon pa e aña aki 2 miyon hende. Diamars cu a pasa un mocion den Tweede kamer cu Aruba mester paga un interes penal si no firma e RAft pa via cu nos gobierno tin 3 aña ta firma acuerdonan pero no ta cumpli. Tanto Hulanda como nos gobierno ta hunga cu sentimento di nos pueblo. Interes di pueblo no ta bin na prome luga. For tempo cu nos gobiernonan a subi mercado internacional via banconan local pa fia placa, gobierno di Aruba a viola articulo 29 di nos Statuut der Koninkrijk der Nederlanden. Si gobierno Hulandes a pone un paro na e abuso di poder aki awe nos dushi isla lo no ta hinca den e abismo di debe.
Nos gobiernonan tanto di mep, AVP y awe RAIZ ta culpabel na e debenan aki. E gobernantenan aki a gosa mientras pueblo ta sufri,pero nan ta lubida cu nos tin un Dios cu ta odia inhusticia. For di 2001 pa awe den 2023 nos gobernante ta suta pueblo cu medida pero e dia lo yega cu tur locual cu boso a haci pueblo lo boomerang riba boso pa tur inhusticia cometi. Actualmente nos parlamento no por pasa ningun ley paso gobierno no tin mayoria den Parlamento. Pronto nan lo baha cu vakantie. Pueblo su oracion pa nan no drumi anochi sino entrega nan retiro. Un gobierno inmoral no tin derecho di existencia. Partido CURPA ta e unico alternativa.
