Biba cu poco recurso ta locual cu hopi ta pasando durante e ultimo añanan tras di lomba. No for di awo sino di semper. Tin por lo menos un ciudadano di Bushiri cu a tuma e curashi di para dilanti camara y conta su storia. Ta trata di Marcelino Solognier, el a cuminsa na conta cu e ta un berguensa p’e pero cu orguyo bo no ta come.
Durante un entrevista cu representante di 24ora.com Marcelino a conta cu e mester di yudansa. Na prome instante e tin mester di un bais, e ta pidi e pueblo pa yud’e cu un bais di coriente p’asina e por core di trabou pa cas.
Solognier den pasado tabata envolvi den un accidente basta grave, pa suerte e ta na bida awe. E ta sinti cu ta bon mes e no a keda mucho largo den hospital sino nan lo a kita un band’i pia. E ta sufri di soledad, e ta pasa e ultimo añanan su so y ningun hende ta bishit’e. Ni su yiu homber di mas chikito ta yam’e y puntra “papa, conta”, ta algo cu ta duel e masha tanto.
E situacion cu e ta bibando aden actualmente ta rekeri yudansa, por lo menos pa un hende cu por papia cu ne. A habri Pasco y Aña Nobo su so, e ta tristo cu e no mira su famianan mucho menos su dos nietonan.
Su salario no ta yega, ta apenas seis ora pa dia e ta traha y gran parti di su salario ta bay pa paga un debe di accidente caminda cu abogado ta kita tur placa for di dje. Su frigidaire ta bashi y ta pidi comunidad pa yud’e. Ta algun shen florin e ta bay cas cu ne y e placa ey no ta yega pa biba. Por tuma contacto cu Marcelino na 7437973.
