Awe a haya reaccion di e compania nacional di telecomunicacion SETAR riba e preocupacion extra pa un habitante di Wayaca. Un preocupacion cu tin di haber cu internet continuamente ta cay afo.
E ciudadano a expresa di no ta haya reaccion di SETAR riba e situacion aki. Redaccion di 24ora.com a tuma contacto cu SETAR y a haya informacion cu nan ta na altura di e problema existente den e bario di Wayaca.
Nan a keda di sinta diamars atardi cu sr. Prins, kende ta vocero di e 130 habitantenan cu a firma un carta dirigi na SETAR den cual ta expresa nan malcontento cu e servicio di internet. “Nos ta na altura di e situacion na Wayaca,” a informa 24ora.com.
Den e reunion cu Prins a papia riba e opcion cu tin riba mesa. Wayaca ta e proximo bario pa wordo cambia pa fiber. Pero e ta un trabou cu lo dura sigur seis luna, debi cu a scoge pa pasa e fiber bou di tera. Asina cu e trabou aki keda cla, por bisa cu a soluciona e problema cu e bario aki tin cu internet.
