Diasabra atardi den un ambiente ameno y energetico, Club di Forsa Paradise Strength Aruba bou di liderazgo di coach Jonathan Wever, cu ta forma parti di Aruba Bodybuilding & Powerlifting Association, hunto cu BodyFitness Gym & Nutrition a organisa un evento unda a midi e forsa absoluto di atletanan, den forma di un 1 Rep Max Deadlift Challenge. Aki e atletanan a haya den formato di e deporte di Powerlifting tres oportunidad pa por lanta e peso mas pisa nan por pa 1 ripiticion den e disciplina di deadlift.
E evento aki a surpasa tur expectativa, unda a conta cu exactamente 50 atleta cu a participa, representando mas cu 7 diferente gym/club di riba nos isla. Tin di remarca cu di e 50 atletanan aki, por a conta cu participacion di 17 dama, unabes mas demostrando cu e deporte di forsa ta pa tur hende. Manera mayoria deporte di forsa manera powerlifting of weightlifting, a competi den diferente categoria di peso, unda a premia e top 3 di cada categoria, y na final tambe a saca un top 3 den overall den cada division, por medio di un calculacion a base di peso corporal y e peso cu a logra den deadlift. Esaki a crea sigur un ambiente di bon competencia amistoso bou di e diferente club y atletanan.
Den division di dama den e -70kg, e bataya pa di dos luga a termina a base di peso corporal, como ambos atleta a logra deadlift e mesun peso. Cu un diferencia di apenas 0.1kg di peso, Kaylee-Sue Danies a logra e medaya di plata, y asina Lise Goldman di Warriorhouse Gym a Logra captura di tres luga. Ta bon pa remarca cu ambos dama a logra di kibra nan record personal durante e bataya aki, elevando nan nivel den e proceso di competencia. Ganado di e categoria caba den man di atleta di forsa den varios deporte, particularmente Olympic Weightlifting, unda el a logra cualifica pa e mundial di 2015, Jenifer Piter. Jenifer cu apenas un peso corporal di 60kg, a logra deadlift 175kg, capturando e victoria.
Den e categoria di +70kg, Shari-Ann Phillips di Paradise Strength Aruba a logra kibra su record personal cu marca grandi y a logra haci 135kg di deadlift, cu a dun’e e di tres luga. Den di dos luga, nos tin coach di CrossFit na BFN CrossFit, May-Ling Correa cu a logra mehora su record personal cu un deadlift di 139kg. Den prome luga cu un victoria comodo, a keda atleta di Olympic Weightlifting, Nathaly Geerman, cu apenas algun dia atras a representa Aruba den evento Panamericano de Mayores na Colombia. Nathaly sigur ta un atleta di gran potencia y a logra demostra esaki cu un lift facil di 161kg pa e victoria.
Den e division di cabayero, a conta cu 3 diferente categoria di peso. Den e categoria di -85kg, unda tabatin e cantidad mas grandi di atleta den un categoria cu 14, a logra mira hopi atleta reconoci den mundo di forsa na Aruba, y algun cara nobo cu hopi talento cu sigur lo sigui progresa y bira atletanan di taya mayor den futuro. Na di tres luga, representando su gym di Fit Factory, atleta hoben Johnathan Fountos cu apenas 74kg di peso corporal, a logra un lift di 240kg, mehorando su marca personal substancialmente. E atleta aki a mustra un intensidad di ta fuerte den competencia, y ta spera cos grandi di dje den futuro. Na di dos luga, a keda Yunes Guzman, representando Paradise Strength, unda el a logra deadlift 241kg pa asina captura di dos luga. Sigur un atleta no desconoci den e mundo di forsa, como e ta campeon nacional di Olympic Weightlfiting 2 aña consecutivo di 2018 y 2019. Den prome luga a keda coach di preparacion fisico di atletanan di varios deporte, en particular baseball, Ross Ismail di Crash of Thunder, unda a logra captura e medaya di oro cu un deadlift di 265kg.
Den e categoria -105kg, a mira un tremendo bataya pa di dos luga, unda ambos atleta cu a termina riba podium a logra un deadlift di 240kg, cu e diferencia marca den peso corporal. Na di tres luga a keda atleta di Paradise Strength, Thomas Arends, cu ta un atleta unico, cu ta competi no solamente den deportenan di forsa, si no tambe ta core den Ronde van Aruba y otro tipo di competencia di distancia. Na di dos luga a keda un atleta cu su fam sigur ta conoci den mundo di deporte. Melvin Li representando e team di su ruman homber, campeon Panamericano di Weightlifting Jason Li, a logra mustra cu e talento pa forsa ta core den famia, y cu un peso corporal di apenas 85.8kg, a logra haci 240kg. Den prome luga, cu e margen mas grandi di victoria di e dia y cu un deadlift cu ta increiblemente fuerte, a keda Francis Tromp di Warriorhouse Gym, unda cu un peso corporal di 99.9kg, a logra gana, mehorando su marca personal cu un deadlift di 318kg! Esaki ta 700lbs, cu sigur ta un “milestone” grandi pa cualkier atleta di forsa, specialmente na un peso corporal asina.
Den e ultimo categoria di dia, e hombernan riba di +105kg di peso por a mira un bataya titanico entre e dos deadlifters nan mas fuerte di nos isla. Ademas di esaki, un grupo fuerte di 6 atleta mas a haci esaki un bataya di numbernan grandi. Den di tres luga, cu mehoracion grandi di su marca personal cu un deadlift di 280kg a keda Marcel Willems di Paradise Strength. E competencia pa ken lo a tuma e prome luga sigur a mira un enfrentamento entre dos di e atletanan mas fuerte riba nos isla. E dos amigonan nan aki a logra “hype” otro up durante e ultimo simannan prome cu e competencia, y esaki sigur a yuda pusha tur dos pa e nivel mas halto di prestacion. Despues di un back&forth y wega strategico, den di dos luga a keda atleta di Warriorhouse Gym, Geomar Jaramillo. Sigur un atleta conoci, cu ta representa Aruba internacionalmente den competencia di powerlifting den e federacion di IPL, unda ultimo el a haci e intento pa kibra e record mundial den su categoria y a logra pone record Americano di deadlift den e SuperHeavyweights Masters I.
Esaki ta muestra cu e deporte tambe ta pa atleta di tur edad. Geomar a logra un deadlift di 335, cu sigur ta mustra cu e ta cla pa kibra e recorda ora e unabes mas purba den luna di october di e aña aki. Su contrincante y amigo cu a logra sali cu e victoria, a logra e deadlift mas grandi haci na Aruba, cu un peso lanta di 345kg! Ganando su categoria a keda Andrew Jorick Jansen di BodyFitnessGym&Nutrition. Mas impresionante ainda, ta cu a logra e deadlift aki, cu un peso corporal di apenas 109.8kg. Den un momento bunita cu a mustra tremendo “sportsmanship”, Geomar a opta pa e mes haci e entrega di medaya di oro, y alabes gradici Andrew pa e bataya y dun’e pabien.
Manera a menciona, ademas di saca e ganadonan di categoria, a logra saca e ganadonan “Overall” a base di un calculacion cu ta wordo uza den powerlifting yama “wilks.” Ta uza peso corporal y e peso di deadlift logra pa asina midi tur atleta den un solo categoria. Den esaki por bisa cu e resultando di e damanan a keda igual, unda cu e damanan den e -70kg a keda den e top 3 overall den e mesun secuencia. Di tres luga a bay pa Lise Goldman di Warriorhouse Gym, di dos luga a keda pa Kaylee-Sue Danies y ganado absoluto y miho deadlifter femenino na Aruba a keda den number di Jenifer Piter.
Den e cabayeronan, a determina hopi lihe e prome dos luganan, pero e bataya pa di tres luga den overall. A mira un number cu no a subi podium den e categorianan. Na di tres luga a keda atleta di Paradise Strength Aruba, cu den categoria a keda di 4 luga cu un deadlift di 235kg, pero cu un peso corporal di apenas 65.6kg. El a logra un wilks score surpasando tur otro y hopi cerca di esun cu a keda di dos luga overall. E atleta aki, hunto cu Corina Boekhoudt lo bay representa Aruba den e competencia regional di powerlifting e luna aki na e “19th NAPF Regional Championships 2022”. Na di dos luga a keda Francis Tromp di Warriorhouse Gym y ganado absoluto y miho deadlifter di Aruba a keda den nomber di Andrew Jorick Jansen.
Pa termina, ta importante pa remarca cu durante e evento, a pidi e atletanan cu participa un contribucion di 25 florin, y cu e suma aki lo bay pa termina di recauda fondo pa yuda e dos atletanan local representa nos pais durante e evento regional. Tin di bisa cu e suma ricibi durante e evento aki, a logra e meta final di cubri tur gasto di e atletanan, y kier gradici tur hende y compania cu a contribui pa logra esaki.
Por ultimo, ta gradici tur persona cu a dedica di nan tempo liber y energia pa yuda organisa y yuda durante e evento aki. Sin e apoyo di e team dedica aki no lo a logra haci esaki posibel. Un danki grandi na e publico a presenta pa wak y apoya nos atletanan local cu sigur a crea un ambiente unico. Paradise Strength Aruba lo tin mas evento e aña aki, asina ta, keda pendiente y sigui e club riba rednan social.
| Trophies | Names | Wilks | |
| Trophy 1: Overall Winner Female | 1 | Jenifer Piter | 175.61 |
| 2 | Kaylee-Sue Danies | 170.81 | |
| 3 | Lise Goldman | 170.61 | |
| Trophy 2: Overall Winner Male | 1 | Andrew Jansen | 204.35 |
| 2 | Francis Tromp | 193.61 | |
| 3 | Joshua Frias | 185.45 | |
| Medals | Names | Deadlift | |
| -70kg Women | KG | ||
| Gold, 1st place W -70kg | Jenifer Piter | 175 | |
| Silver, 2nd place W -70kg | Kaylee-Sue Danies | 160 | |
| Bronze, 3rd place W -70kg | Lise Goldman | 160 | |
| +70kg Women | |||
| Gold, 1st place W +70kg | Nathaly Geerman | 161 | |
| Silver, 2nd place W +70kg | MayLing Correa | 139 | |
| Bronze, 3rd place W +70kg | Shari Ann Phillips | 135 | |
| -85kg Men | |||
| Gold, 1st place M -85kg | Ross Ismail | 265 | |
| Silver, 2nd place M -85kg | Yunes Guzman | 241 | |
| Bronze, 3rd place M -85kg | Johnathan Fountos | 240 | |
| -105kg Men | |||
| Gold, 1st place M -105kg | Francis Tromp | 318 | |
| Silver, 2nd place M -105kg | Melvin Li | 240 | |
| Bronze, 3rd place M -105kg | Thomas Arends | 240 | |
| +105kg Men | |||
| Gold, 1st place M +105kg | Andrew Jansen | 345 | |
| Silver, 2nd place M +105kg | Geomar Jaramillo | 335 | |
| Bronze, 3rd place M +105kg | Marcel Willems | 280 |
