Minister di Turismo y Salud Publico Dangui Oduber ta duna un splicacion amplio riba henter e situacion di ‘eigen bijdrage’ y con ta bay reduci e gastonan pa evita esaki. E mandatario nunca tabata di acuerdo cu pa introduci e ‘eigen bijdrage’ contrario na partido AVP cu si tabata wak esaki como un alternativa.
Situacion bou leynan existente
Den cuadro di estudio reciente haci a peticion di Ministerio di Turismo y Salud Publico, pa cu e mercado di importacion di remedi na Aruba, a constata (den comparacion cu otro paisnan den Reino) lo siguiente:
1. No tin competencia den e mercado di importacion di medicina na Aruba, caminda cu na Hulanda a introduci un permiso special pa stimula competencia y baha prijs.
2. Un cantidad substancial di remedi cu ta importa ta registra na Hulanda y ta importa pa medio di un permiso special y temporario den situacion di scarsedad.
3. Remedi cu ya ta registra na Hulanda/Europa ta registra aceleradamente na Sint Maarten. Na Corsou na 2020 a cambia ley pa por registra remedi generico acelerademente si ya nan ta registra na Merca, Europa of Canada. Na Boneiro a stop registracion local y ta basa nan mes riba registracion di remedi na Hulanda.
4. Tin un rekisito (‘tropendossier’) cu e expertonan ta considera innecesario den e proceso di registracion di mayoria di remedi cu ya ta registra na Europa/Merca.
5. Na Hulanda regularmente ta reuni cu e sector pa baha prijs of contene gasto di remedi caro y ta aplica e ‘Apotheekinkoopprijs’ (AIP: prijs maximo cu mag di bende remedi cu botica).
6. Varios remedi (‘zelfzorgmiddelen’) bendi na Hulanda y Merca na otro luga apart di botica, aki ta bendi solamente den botica.
7. Aruba no conoce un regulacion specifico y dilenea pa por duna acceso anticipa na programa di prueba di remedi experimental prometedor na pashentnan cu ya no por wordo trata cu remedinan existente (‘early access/compasionate use’).
Solucion
A base di estudio haci a conclui cu tin un potencial grandi pa modernisa nos leynan y baha gasto di remedi. Den e cuadro ey lo bay cambia e Decreto di remedinan (‘Landsbesluit verpakte geneesmiddelen’) a base di entre otro e siguiente puntonan di salida:
1. Lo stimula competencia y evita scarsedad di remedi a base di structuracion di e duracion di e diferente tipo di permiso di importacion di remedi y asina crea mas certesa (‘rechtszekerheid’) y un ‘level playing field’ pa tur cu ta opera riba e mercado di importacion di remedi, sea cu ta importador of boticario.
2. E ‘Apotheekinkoopprijs’ lo ta bay ta e base (‘richtlijn’) central pa calcula e prijsnan di remedi importa.
3. Lo introduci un structura di dialogo a base di cual lo reuni regularmente cu e sector (importadornan, boticarionan/ HOH/AZV) pa baha prijs di remedi caro. Den esaki lo coopera cu Hulanda cu como mercado mas grandi tin mas influencia pa cu prijs di remedi caro.
4. Remedi cu ya ta registra na Hulanda/Europa/Merca of Canada lo por wordo registra aceleradamente na Aruba.
5. Varios remedi cu ta wordo bendi na Hulanda y Merca na otro luga aparte di botica, aki na Aruba tambe lo por bay wordo bendi no solamente den botica. Esaki lo por baha prijs di e remedinan di cuido propio (‘zelfzorgmiddelen’) y ademas crea un ambiente mas familiar pa turistanan cu ta custumbra di tin acesso na remedi asina no solamente den botica.
6. Lo introduci un regulacion specifico pa por evaulua si por duna acceso anticipa na cierto programa di prueba, cu gasto minimo of conteni, di remedinan experimental prometedor, na pashent cu ya no por wordo trata cu remedinan existente.
7. Dentro di 24 luna lo evalua a base di un articulo di evaluacion (‘evaluatiebepaling’) si mester haci ahustacion adicional pa garantisa acceso na remedi na prijs rasonabel.
A base di e cambionan proponi lo stimula competencia y innovacion, y a calcula cu lo por spaar minimo entre 6 pa 8 miyon florin pa aña riba gasto di remedi, cual lo reemplasa entradanan calcula y asina evita introduccion di un propio contribucion (‘eigen bijdrage’) door di asegurado.
Di e manera aki Minister Dangui Oduber ta evita pone mas peso riba pueblo su lomba y na mes momento cumpli cu e instruccion di Hulanda pa corta 60 miyon den cuido. Algo cu e mandatario nunca tabata di acuerdo cune pero mester a simplemente cumpli cu ne.
