E CPI pa luna di Februari 2021 ta 97.00, loke ta representa un subida di 0.1% compara cu e indice di Januari 202 (96.89) y acumulando un caida di 0.1% te cu na Februari di e aña aki. E cambio di e CPI pa e ultimo diesdos (12) lunanan (Februari 2020 te cu Februari 2021) ta -1.9%, un caida di 4.2 punto di porcenahe (ppt) compara cu e periodo corespondiente di aña pasa (2.3%). E promedio anual di e tasa di inflacion pa e periodo di Februari 2020 te cu Februari 2021 ta -2.2%, un caida di 6.1 ppt compara cu e 3.9% registra den e periodo di Februari 2019 te cu Februari 2020. Durante e luna aki, cuatro (4) di e diesdos (12) sectornan a registra subida di prijs. E subida cu tabata tin e mayor efecto riba e CPI a wordo registra pa e sector di “Transporte” (2.2%), causando un efecto di 0.27 ppt. E subidanan den e sectornan restante a contribui cu un efecto di 0.02 ppt riba e CPI di Februari 2021.
E subidanan aki a wordo contraresta parcialmente door di caida den e indice di e sectornan di “Restaurant y hotel” (-2.2%), “Recreacion y cultura” (-0.3%) y “Paña y sapato” (-0.8) cu a contribui cu un efecto di respectivamente – 0.10, -0.03 y -0.02 ppt riba e CPI di Februari 2021. E caidanan den e restante sectornan a contribui cu un efecto di – 0.03 ppt riba e CPI di Februari 2021. E subida den e sector di “Transporte” a wordo causa door di principalmente un subida di 3.5% den e categoria “Gasto relaciona cu uzo di vehiculo di transporte personal”, causando un efecto di 0.26 ppt.
E caida den e sector di “Restaurant y hotel” a wordo causa door di un caida den e categoria “Servicio di alohamento” (-59.8%), causando un efecto di -0.10 ppt. E caida den e sector di “Recreacion y cultura” a wordo causa principalmente door di un caida 1.3% den e categoria “Vacacion”, causando un efecto di -0.04 ppt. E caida den e sector di “Paña y sapato” a wordo causa door di caida den e categorianan “Sapato” (-1.4%) y “Paña” (-0.7%), cada un causando un efecto di -0.01 ppt.
Canasta di consumo
E canasta di consumo di e CPI ta consisti di 408 bienes y servicionan. Compara cu Januari 2021, 43.6% di e bienes y servicionan aki a conoce un aumento di prijs causando un efecto di 0.57 ppt, mientras cu 36.8% ta mustra un caida di prijs, cu a contribui cu un efecto di -0.46 ppt y pa e restante 19.6% no tabata tin cambio den prijs. Prijsnan di bienes a subi cu 0.4% y a causa un efecto di 0.22 ppt. Prijsnan di servicionan a conoce un caida di 0.3% y a causa un efecto di -0.11 ppt riba CPI di Februari 2021.
Core inflation
E CPIC (core inflation) – CPI excluyendo e efecto di energia y cuminda – a registra na Februari 2021 un caida di 0.9%. E indice di energia – cu ta consisti di e productonan: electricidad, awa, gasolin y diesel a registra un caida di – 7.9%. E indice di cuminda a registra un caida di 2.0%.
Bestaansminimum
E bestaansminimum pa un hogar consistiendo di dos (2) adulto y dos (2) mucha (edad 0-15 aña) na Februari 2021 ta Afl. 4,742, un caida di Afl. 94 compara cu Februari 2020 (Afl. 4.836). E bestaansminimum pa un hogar di un (1) adulto ta Afl. 2,258, un caida di Afl. 45 compara cu Februari 2020 (Afl. 2.303). Cambio di prijs di petroleo, utilidad, gasolin y diesel na Februari 2021 Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na Februari 2021 e prijs promedio pa bari di petroleo (US$ 59.10) a conoce un subida di US$ 7.87 (15.4%) compara cu Januari 2021 (US$ 51.23).
Prijs di electricidad y di awa no a cambia compara cu Januari 2021. Consecuentemente, e prijs promedio di electricidad pa vivienda a keda Afl. 240.09, mientras cu e prijs promedio di awa pa vivienda a keda Afl. 137.05. Prijs di gasolin a registra un subida di Afl. 10.40 cen (5.6%) na Februari 2021 y a causa un efecto di 0.22 ppt riba e CPI. Prijs di diesel a registra un subida di Afl. 6.20 cen (4.1%) na Februari 2021 y a causa un efecto di 0.01 ppt riba e CPI.
Februari 2021, utilidad, gasolin y diesel como grupo, tabata tin un subida di prijs di 1.5% compara cu Januari 2021 y hunto tabata tin un influencia di 0.23 ppt riba e CPI, mientras cu e restante 404 bienes y servicio hunto, a conoce un caida di prijs di 0.1% tabata tin efecto un efecto di -0.12 ppt riba e CPI. Cambio di prijs di Cuminda y servicio di catering na Februari 2021
E indice di “Cuminda & servicio di catering” a registra un caida leve di 0.04% na Februari 2021, e cuarto caida consecutivo. E indice di “Cuminda na cas” (-0.1%) a registra un caida, unda cuatro (4) di e diesun (11) indicenan di e gruponan di cuminda na cas a baha na Februari 2021. E indice di “Batata, yuca y batata dushi” a conoce e caida di mas grandi (-10.7%) na Februari 2021. E indicenan di “Berdura” (-2.7%), “Pan y otro productonan di grano” (- 1.1%) y “Bebida no-alcoholico”, (-0.1%) tambe a registra caida.
E indice di “Fruta” (1.5%) a registra e subida di mas grandi na Februari 2021. Ademas, subidanan di 1.3% y 0.9% a wordo registra den e indicenan di “Pisca y otro cuminda di lama” y “Carni”, respectivamente. Den e ultimo diesdos (12) lunanan e indice di “Cuminda & servicio di catering” a baha cu 1.6%. E indice di “Cuminda na cas” a conoce un caida di 2.6%. E indice di “Batata, yuca y batata dushi” a baha cu 18.3%, e caida di mas grandi entre e gruponan di cuminda na cas, mientras cu e indice di “Sucu, jam y otro tipo di cos dushi” a subi cu 1.8%, e subida di mas grandi entre e gruponan di cuminda na cas.
E indice di “Cuminda pafo di cas” no a cambia na Februari 2021 y a registra un subida di 0.9% den e ultimo diesdos (12) lunanan.
Na Februari 2021, “Cuminda na cas” y “Cuminda pafo di cas” como grupo, tabata tin un caida leve di prijs di 0.04% compara cu Januari 2021 y hunto tabata tin un influencia di -0.01 ppt riba e CPI, mientras cu e restante bienes y servicio hunto a experencia un subida di prijs di 0.1% y tabata tin un efecto di 0.12 ppt riba e CPI.
