E CPI (Consumer Prijs Index) pa luna di october 2022 ta 106.30, loke ta representa un subida di 0.1% compara cu e indice di september 2022 (106.20) y acumulando un subida di 5.7% te cu na october di e aña aki.
E cambio di e CPI p’e ultimo diesdos lunanan (october 2021 te cu october 2022) ta 7.0%, un subida di 4.6 punto di porcentahe (ppt) compara cu e periodo corespondiente di aña pasa (2.4%).
E promedio anual (ultimo 24 luna) di e indice di inflacion p’e periodonan di october 2020 te cu october 2021 y october 2021 te cu october 2022 ta 5.1%, un subida di 5.4 ppt compara cu e -0.3% registra den e periodonan di october 2019 te cu october 2020 y october 2020 te cu october 2021.
Durante e luna aki, cuatro di e diesdos sectornan a registra subida di prijs. E subidanan cu tabatin e mayor efecto riba e CPI a keda registra p’e sectornan di “Recreacion y cultura” (2.8%) y “Mobilario” (2.8%), causando un efecto di 0.26 y 0.25 ppt, respectivamente.
E subidanan den e sectornan restante a contribui cu un efecto di 0.12 ppt riba e CPI di october 2022. A contraresta e subidanan aki parcialmente door di principalmente caida den e indicenan di e sectornan di “Transporte” (-1.6%) y “Paña y sapato” (-5.8%) cu a contribui cu un efecto di -0.23 y -0.15 ppt, respectivamente. E caidanan den e sectornan restante a contribui cu un efecto di -0.16 ppt riba e CPI di october 2022.
E subida den e sector di “Recreacion y cultura” causa principalmente pa un subida den e categoria “Vacacion” (11.6%), causando un efecto di 0.30 ppt. E subida den e sector di “Mobilario” a keda causa principalmente pa un subida di 21.9% den e categoria “Mueble y acesorio, tapijt y otro tipo di material pa vloer”, causando un efecto di 0.20 ppt.
E caida den e sector di “Transporte” causa principalmente pa un caida den e categoria “Gasto relaciona cu uzo di vehiculo di transporte personal” (-2.6%), causando un efecto di -0.22 ppt. E caida den e sector di “Paña y sapato” causa principalmente pa un caida di 6.6% den e categoria “Paña”, causando un efecto di -0.13 ppt.
Canasta di consumo
E canasta di consumo di e CPI ta consisti di 408 bienes y servicio. Compara cu september 2022, 49.0% di e bienes y servicio aki a conoce un aumento di prijs causando un efecto di 1.14 ppt, mientras cu 32.8% ta mustra un caida di prijs, cu a contribui cu un efecto di -1.05 ppt y p’e restante 18.1% no tabatin cambio den prijs. Prijs di bienes a baha cu 0.3% y a causa un efecto di -0.20 ppt. Prijs di servicio a subi cu 0.7% y tabatin un efecto di 0.29 ppt riba CPI di october 2022.
Core inflation
E CPIC (core inflation) – CPI excluyendo e efecto di energia y cuminda – a registra na october 2022 un subida di 2.9%. E indice di energia – cu ta consisti di e productonan: electricidad, awa, gasolin y diesel a registra un subida di 12.8%. E indice di cuminda a registra un subida di 9.0%.
Bestaansminimum
E bestaansminimum pa un hogar consistiendo di dos adulto y dos mucha (edad 0-14 aña) na october 2022 ta Afl. 5,311, un subida di Afl. 457 compara cu october 2021 (Afl. 4,854). E bestaansminimum pa un hogar di un adulto ta Afl. 2,529, un subida di Afl. 218 compara cu october 2021 (Afl. 2,311).
Cambio di prijs di petroleo, utilidad, gasolin y diesel na october 2022
Prijs di utilidad (coriente y awa), gasolin y diesel ta determina primordialmente p’e prijs internacional di petroleo. Na october 2022 e prijs promedio pa bari di petroleo (US$ 87.61) a conoce un subida di US$ 2.24 (2.6%) compara cu september 2022 (US$ 85.37).
Prijs di coriente y di awa no a cambia compara cu october 2022. Consecuentemente, e prijs promedio di coriente pa vivienda a keda Afl. 294.56, mientras cu e prijs promedio di awa pa vivienda a keda Afl. 168.73.
Prijs di gasolin a registra un caida di Afl. 13.10 cen (-4.9%) na october 2022 y a causa un efecto di -0.25 ppt riba e CPI. Prijs di diesel a registra un caida di Afl. 10.50 cen (-3.9%) na october 2022 y a causa un efecto di -0.02 ppt riba e CPI.
Na october 2022, utilidad, gasolin y diesel como grupo, tabatin un caida di prijs di 1.5% compara cu september 2022 y hunto tabatin un influencia di -0.27 ppt riba e CPI, mientras cu e restante 404 bienes y servicio hunto, a conoce un subida di prijs di 0.4% y tabatin efecto un efecto di 0.36 ppt riba e CPI.
Cambio di prijs di Cuminda y servicio di catering na october 2022
E indice di “Cuminda & servicio di catering” a registra un subida di 0.7% na october 2022, despues di un subida di 0.5% na september 2022. E indice di “Cuminda na cas” (1.0%) a registra un subida, unda dies di e diesun indicenan di e gruponan di cuminda na cas a subi na october 2022. E indice di “Batata, yuca y batata dushi” a conoce e subida di mas grandi (7.7%) na october 2022. Otro subida significante a keda registra den e indicenan di “Berdura” (3.3%), “Pisca y otro cuminda di lama” (2.9%), “Azeta y otro producto traha di vet” (1.9%) y “Bebida no-alcoholico” (1.7%).
E unico caida na october 2022 a keda registra den e indice di “Fruta” (-1.1%).
Den e ultimo diesdos lunanan e indice di “Cuminda & servicio di catering” a subi cu 10.7%. E indice di “Cuminda na cas” a conoce un subida di 12.8%, unda tur e diesun indicenan di e gruponan di cuminda na cas a subi durante e ultimo aña. E indice di “Azeta y otro producto traha di vet” a subi cu 20.3%, e subida di mas grandi entre e gruponan di cuminda na cas. Otro subida significante a keda registra den e indicenan di “Batata, yuca y batata dushi” (19.4%), “Carni” (16.2%), “Pisca y otro cuminda di lama” (16.2%), “Lechi, keshi y webo” (13.9%) y “Fruta” (11.9%).
E indice di “Cuminda pafo di cas” a baha cu 0.1% na october 2022 y a registra un subida di 5.9% den e ultimo diesdos lunanan.
Na october 2022, “Cuminda na cas” y “Cuminda pafo di cas” como grupo, tabatin un subida di prijs di 0.7% compara cu september 2022 y hunto tabatin un influencia di 0.11 ppt riba e CPI, mientras cu e restante bienes y servicio hunto a experencia un caida leve di prijs di 0.02% y tabatin un efecto di -0.02 ppt riba e CPI.
