Mientras cu di un banda nos economia ta respondiedo positivamente riba e eliminacion di e medidanan pa evita contagio di Covid-19, awor ta resulta cu casonan di contagio ta aumentando tur dia mas y mas. Awe diadomingo a informa cu, despues di hopi siman, cu Aruba a bolbe alcansa y a hasta surpasa e cantidad di 200 caso activo cu e virus. E cantidad di pashentnan interna den hospital ta bou di control, sinembargo cu e crecemento den casonan activo, ta dificil pronostica si e cantidad di pashent interna lo sigui abou asina.
Despues cu pa algun siman e casonan di Covid-19 tabata relativamente bou di control, te cu Directie Volksgezondheid Aruba (DVG) a dicidi cu, mirando cu no tin mucho caso activo mas, a elimina mayoria medida di precaucion pa preveni contagio di Covid-19. Door di esaki tambe, Crisis Team a duna lus berde pa habri tur cos normal.
Pero den ultimo dianan, ta nota un aumento di casonan di Covid-19. Diabierna caba Aruba a cera e dia cu 158 caso di Covid-19 activo, di cual 32 tabata casonan nobo. Di esaki diesocho tabata residente y diescuater no residente.
Un tendencia di ultimo dianan cu e cantidad di turistanan cu sea ta bin cu Covid-19 of ta contagia cu Covid-19 na Aruba, a conoce un aumento drastico.
Asina pues, nos a habri fin di siman cu 158 caso activo pero ta habri siman cu 210 caso activo. Un aumento di 33%, cual ta hopi pa un solo fin di siman.
