A pidi presencia di polis den area di Rancho na Playa pa un caso di agresion cu a tuma luga eybanda. A bin topa cu dos persona y un di nan visiblemente herida.
Cara tur na sanger mientras tabata splica kico ta locual a pasa cu ne. Esaki a tuma luga den aproximadamente 4:00 pm patras di corte na playa, den e hanchi patras di ex- Panaderia Moderna.
Mirando e seriedad di e herida di e victima, a pidi presencia mesora di ambulance pa asina nan por bin atende cu ne. E victima ta conta cu el a ricibi golpi cu un piedra despues di un discusion formal cu un adicto ambulante den e zona.
Na yegada di polis, e agresor a bandona sitio caba. Ambulance a tende cu e persona y por tabata notabel caba cu e tin un fractura na su nanishi y cu probablemente e lo tin mester di atencion medico.
Na mes momento a recomend’e pa presenta na warda di polis pa un denuncia contra e agresor.
