Recientemente Scol di Musica Rufo Wever a tene su Concierto Obsekio di Pasco den Cas di Cultura.
Mas cu 125 alumno a presenta sea como solista, trio of ensemble chikito, grandi, mediano, mixto of di Fio, bao guia di nan maestronan di musica. Den e recital a presenta entre otro Little drummer boy, Awasero, Requiem, Happy Christmas, Tera Cora, Fantasie Impromptu, Seis’or y Libertango. Maestro di ceremonia p’e anochi aki tabata Addonsito Croes.
Un palabra di pabien ta bay pa e maestro- y guianan Ryan Maduro, Franklin Granadillo, Carlos Bislip, Jaderick Croes, Hester Mathijsse, Rob Rijnbout, Sergio Jansen, Derrick Lopez, Denzil Tromp, Stephen Diaz, Catherine Provence, Chucho Hoek y Irina Werleman.
Un momento unico tawata e standing ovation cu e publico a brinda e dos pianistanan hoben di 14 y 17 aña Emile Tromp y Gian Giel.
Den 2023, SDMRW lo tene un concierto grandi dedica na e 70 aña di existencia di Stichting Arubaanse Muziekschool.
