No ta prome biaha cu tin candela cu ta causa molester pa e habitantenan di e bario. Apesar cu e empleadonan di Serlimar ta haci nan best pa por mitiga e problema, esaki hopi biaha no ta logra. Director di Serlimar, Anko Koopmans, ta conta cu banda di 1:30am a alert’e cu un candela a cuminsa riba e cero band’i panort y pabao un tiki. Tin algun ekipo cu no ta den servicio y no por a yega suficiente lihe na dje.
E candela a plama lihe y loke cu tin disponibel, ta na partinan cu no por yega asinaasina y pusha santo riba dje. Tin hopi obheto tambe y hendenan ta sigui tira sushi eyriba pasobra no tin otro caminda pa tira sushi na Aruba.
E problema di Parkietenbos ta cu el a sali for di su limitenan. En bes cu tin un buraco cu ta maneha, tin cel, cu antes tabata asina, awor aki ta un cero. Y un cero tin su randnan na banda. E randnan ta na unda cu bo no por yega mas cu mashin, pasobra e tin un helling y e helling, si ta bay cu e mashinnan eyriba, bo tin chens cu hasta bo ta sali cay y bo no tin control mas riba e mashinnan riba e cero.
Esey tabata e problema di diasabra atardi. E ta mustra cu anochi e candelanan a bay over na e parti, no full pazuid, pero parti pabao di e cero. E ta net na unda e rand di e dump ta cerca di e mangrovenan. E parti ey tambe ta na e rand, bo no por yega cu mashin. Anochi no tin luz eyriba y mester pensa con por haci’e mas sigur posibel. A kedi di regresa awe mainta pa fia un bulldozer cu santo.
Manera cu a paga e candela di e tairanan, cual a bay bon y basta lihe, Koopmans ta contento di con ta tackle e sistema cu tiki material pa paga e candelanan y cu poco presupuesto. E placa tambe ta scars, e ta menciona. Y pa toch haci un trabao cu ta purba di causa menos molester cu ta posibel.
E suerte cu tin awor aki, e biento a cay y no ta hiba e huma mas pa e bario. Ta dolor den curason pa haci esaki. Koopmans a bin di hopi otro industria cu ta combati candela y sa cu e trahadonan aki di Serlimar por ta no ta tur ta mesun dedica na e trabao aki. Pero esunnan cu Koopmans tin ta trahando cu nan, ta mustra cu pa nan tambe, no ta wak’e como un bon cos y tin dolor na nan curason. Den e caso aki ta pidi disculpa na e habitantenan cu e candela y explosicionnan. Tin boter di gas cu ta bay halto.
E asunto di dump na Parkietenbos ta un problema en general na Aruba, cu ta tira tur sushi mescla eyriba. E ta un problema cu tin cu bay den politica tambe, den Parlamento. Unda cu por haya oido pa hende cuminsa pensa riba separacion. Riba e dump aki ta haya tur cos di Aruba. No tin excepcion. For di boter di gas, como cilinder cu airconan ta uza. Tur cos ta explota awor aki.
Por mira candela di tur diferente color. Esey ta nifica cu tur cos ta kimando riba Dump. Ta lag’e asina. E preocupacion lo ta si e biento cambia bin riba e isla. Eynan si lo tin hopi molester di huma. E candela mes no tin chens pa plama ningun caminda. E ta riba e cero. Tin un pida cu e no tin sushi pa bay na e mangrovenan. E no tin manera pa e plama of tin un peliger pa e area of hende.
Hecho ta cu na mas di un ocasion, den pasado, ex-Minister Otmar Oduber a yega di anuncia cu a cera dump, pero esey en realidad no ta e caso. Locual a sosode ta cu e sushi domestico y industrial ta bayendo EcoGas pa procesa, traha bailes y dera na Ser’i Teishi. Pero, tur hende cu ta haci nan cura limpi of tin taira pa benta afo, ta hacie awor riba e mesun dump na Parkietenbos. Kisas mester traha riba e idea pa manda esey tambe EcoGas pa procesa eyden y asina evita cu e bario ta keda bou un presion y spanto cada bes cu tin candela riba dump.
Ta ora pa awor si, definitivamente, cera e dump pa acceso di publico y sigura cu e bario por drumi anochi trankil, sin e bista peligroso di candela y creando un sentido di miedo y panico cu si algo por pasa cu nan den nan soño.
