Diadomingo atardi ta sosode un accidente na e famoso crusada Emmastraat y Koningstraat na Playa caminda cu pa falta di preferencia ta keda sosode accidentenan cu dañonan material innecesario y of por yega na casonan mas serio y lamentabel cu por costa bida di hende.
Ta conoci cu e crusada aki ta un di esnan cu mas accidente ta registra pa motibo cu trafico cu ta bin di pariba coriendo riba Koningstraat no ta duna preferencia na e trafico cu ta transita for di Emmastraat direccion zuid. Na momento cu yega e crusada aki e trafico ta haya e sorpresa cu, aunke e ta riba caminda di preferencia, e trafico di paribo no ta para y gran mayoria di biaha riba un velocidad basta halto cu ni maske purba di para, e impacto ta inevitabel.
Varios biaha e pasada ta bay sin consecuencia. No por bisa esey tur biaha. Esaki ta djis un prueba mas con chauffeurnan ta keda sin duna preferencia y causa accidente.
Esaki ta e caso di awe un biaha mas, caminda cu ta impacta den otro na e crusada aki cu consecuencia di hopi daño material. Comunidad a sugeri na mas di un ocacion pa bin cu un solucion pa e crusada aki, y e opcion cu mas a bin dilanti ta esun di un “verkeers plateau” pa asina reduci e velocidad y evita accidente di sigui pasa.
E Optra ta e auto cu e chauffeur a faya den trafico. E chauffeur cu e SUV color cora no por a evita e accidente. E impacto fuerte a causa cu e Optra a dal un buelta di 180 grado. Logicamente e chauffeur a pasa den un susto. Esaki ta e imagennan di e accidente.
Afortunadamente no tabata tin hende seriamente herida y por a tuma nota di presencia di seguro na sitio cu lo tin cu bay cubri cu gastonan.