Minister Glenbert Croes na Hulanda a participa den e Rotterdam Energy Congress. Esaki cu e meta di purba di haya sa mas di loke ta energia rond di mundo y con por aplica esaki na Aruba.
Importancia pa participa na e encuentro aki ta topa cu companianan di renombre cu normalmente ta dificil pa drenta den contacto cu nan. Ta trata por ehempel Saudi Aramco, Ministerio di Energia di Saudi Arabia, PWC, British Petroleum y hopi otro compania cu cualnan por haci un acercamento directo, presenta kico t’e business case di Aruba pa transforma e caminda energetico di un refineria transicionando, pa e desaroyo di gas natural, hydrogen y e windfarm, solar power. Pero tambe pa informa di kico ta haciendo na Aruba, pa mira si por atrae nan tambe bin riba e isla.
Interesante, segun e mandatario encarga cu asuntonan di energia, ta e presencia di cantidad grandi di compania di e reputacion y cu un forsa economico grandi, pero tambe di e mesun mision di logra sostenibilidad den e caminda di transicion energetico, energia renobabel y energia alternativo, pa un isla manera Aruba haya nan atencion, mientras cu e caminda normal lo ta uno hopi largo. Durante e convencion ta haya nan tur bou di un solo dak.
Fuera di esey, Minister Glenbert Croes a reuni den un tipo di Mesa Rondo, caminda cu tur e ministernan di energia na mundo, tabata presente. Aki a mantene un combersacion habri y a indica cu Aruba como isla chikito ta haci hopi. Pero en realidad, e paisnan grandi, cu ta polute mas cu tur otro ta esunan cu ta busca pa inverti den e tecnologia innovativo aki pa transicion.
Segun Minister Croes, ta haya cu mester presenta Aruba como potencial di inversion. Laga Aruba como pais chikito, participa den e proceso di e oportunidadnan di inversion di e industrianan aki, por ehempel pa produccion di Hydrogen, pa no solamente pa Aruba, pero tambe p’e region y exporta pa Hulanda of Europa.
Pa duna un ehempel Europa lo bay tin mester di 1.2 pa 1.3 miyon ton di hydrogen. Nan no por produci tur. Probablemente nan lo mester importa 70% di esey. Aruba su business case ta pa bay produci 220 mil ton di hydrogen pa aña. Aruba por exporta esey pa Hulanda. Lo desea Hulanda, Alemania, Francia of Spaña, firma acuerdo cu nan, unda cu loke Aruba produci na Hydrogen, nan lo cumpra, fuera di e necesidad pa mercado local.
Na momento cu tin e acuerdonan ey sigura, lo por presenta esaki na Minister di Energia y Clima di Hulanda, Rob Jetten diahuebs.
Na Aruba tin un zona di refineria cu kier re-desaroya. Tin bon oportunidad aworaki ta bin y e mandatario a menciona Eagle LNG cu ta bin cu exploracion di gas, pero tambe tin Hydrogen Valley. Tin e partinan bon di e refineria cu lo por uza mientrastanto cu ta depende di fossiel fuel transicionando, saliendo despues pa full LNG, pa despues full Hydrogen. Ta importante pa nan tuma Aruba na cuenta, a pesar cu nos ta un isla chikito.
Segun e minister, el a indica cu Aruba ta esun cu menos ta haci sushi na medioambiente como isla chikito. Pero e promenan pa disparce si cos bay malo. “Si mundo no tuma e tema di cambio climatico, con nos ta controla e emisionnan na serio, pa proteha nos clima, nos medio ambiente, nos mundo, nos habitat, e promenan pa bay t’e islanan chikito door di e nivel di lama cu lo subi.”
A puntra e minister kico a siña di COP28. El a contesta cu no ta loke Aruba of e islanan chikito a siña, sino loke e pais grandi a compromete nan mes pa haci cu ohala nan haci tambe. E ta hopi util di e punto di bista di conscientisacion pa atencion p’e islanan chikito manera Aruba. Su colega di Corsou, Ruisandro Cijntje tabatey y el a dirigi su mes tambe n’e paisnan grandi, a indica cu pa loke ta ehecucion di proyecto pa Aruba, mester tin acceso directo n’e companianan grandi pa mira loke cu Aruba, Corsou y otro islanan den Caribe ta haci.
Por ehempel Saudi Aramco ta un di e companianan mas grandi den produccion di crudo. Pero alabes, door di nan forsa economico, nan ta invertiendo den sostenibilidad, den tecnologia nobo. Y riba e parti di sostenibilidad a combersa cu nan. Den Saudi Aramco tin varios Arubiano trahando pa nan y e mandatario a expresa e deseo pa logra haya Saudi Aramco na Aruba riba sostenibilidad, esta e sistema Hydrogen.
Nan ta invertiendo riba tecnologia, con pa converti hydrogen den amonia, pa bay export’e, con ta converti di amonia pa hydrogen bek ora di transporte. Door cu nan tin e forsa economico, siendo un di e productornan mas grandi di petroleo, obviamente nan tin forsa pa inverti den tur e tecnologianan alternativo aki. Ta interesante pa mira nan perspectiva y di Aruba, p’asina planta un simia cu tin un isla den Caribe cu ta tumando transicion energetico na serio y ta desea pa mira e vision cu tin, pa por fit den nan business model y crea un oportunidad economico pa nos pais.
