Aruba Softball Bond y Comision Organisador ta sumamente contento y orguyoso pa cu e campeonato internacional femenino.
Aruba desde October 2017 na Botswana Africa a wordo honra pa WBSC cu Aruba lo ta anfitrion pa cu e di XIII campeonato femenino di WBSC Suramericana (CONSURSA).
Desde October 2017 trabownan a inicia y a concretisa esaki 27 di October 2018 cu un bunita y colorido apertura. 6 Pais a competi den e campeonato aki di un nivel hopi halto. Durante e ceremonia protocolario di apertura e 6 equiponan aki a hasi nan desfile dilanti un publico grandi y invitadonan.
Grupo di baile di Marisol Peña a presenta un bunita show durante e apertura aki den combinacion cu steelpand di Nico Conner cual a cay masha na agrado di tur delegacionnan presente. Den un solo palabra hopi bunita.
Despues MC Sandra Croes a yama e presidente di WBSC Suramericana ( CONSURSA) dilanti pa hiba su speech. Durante su speech Presidente Antonio Morales a yama Endy Croes dilanti y a sorpresa Endy cu un reconosemento hopi special di WBSC. Un plakaat cu un potret di Endy Croes aden reconosiendo Endy Croes pa su aporte y contribucion pa cu trabownan desplega pa cu desaroyo di softball pa henter e continente Americano como Vice Presidente WBSC Americas y miembro di Directiva Sur Americano y Vice Presidente di ECASC cual ta Confederacion di islanan den Caribe di habla Ingles. Un reconosemento sigur di hopi balor.
Mismo momento a yama Sr. Francisco Chirino dilanti kende tambe a hanja un reconosemento pa su aporte na e deporte di softball den henter su carrera. Na final di e parti protocolario a bay over na lansa e promer bala pa asina declara officialmente e campeonato como habri. Parlamentario Sra. Shailini Tromp Lee a lansa e promer bala mientras Parlamentario Sra. Sue Ann Ras a fungi como bateador y Diputado di Bonaire Sr. Edsel Cecilia a fungi como catcher mientras umpire di Argentina Maria Aren tabata esun encarga tras di plato.
Meraly Kootes atleta di Aruba a lesa e Credo pa cu atletanan y Maria Aren di Argentina a huramenta e Umpiresnan den publico. Despues di esaki Aruba a enfrenta Peru unda Aruba a sali cu un victoria. Miembronan di junta di Directiva di WBSC kendenan tabata presente pa e acto aki ta Sr. Antonio Morales, Sr. Javier Anaya y esposa y Srta. Maria Soto. Di Parlamento di Aruba Sra. Shailini Tromp Lee y Sue Ann Ras. Di Romar Trading representantenan Betto Wernet y Bryan Maduro, di Bonaire Diputado Edsel Cecilia, Di Peru Vice Presidente di CONSURSA Marisa Matzuda y di Colombia Instructor di umpires y alaves e umpire in chief apunta pa WBSC Suramericana pa cu e campeonato aki Sr Mariano Marrugo. Canal 22 a stream e apertura traspasando e signal pa WBSC Americas kende na su turbo a pasa esaki pa tur 5 continente rond mundo. Aruba pabien cu e logro aki pa ta afintrion pa promer ves den historia pa un campeonato oficial.
