Dialuna mainta 10:00am ta tuma luga un reunion urgente yama pa Sindicato di Polis Arubano (SPA) na Club POVA. E topico di e reunion ta relaciona cu e ultimo desaroyonan den e cuerpo di Polis. Ta spera di haya un cantidad grandi di Polisnan presente, specialmente e recherchenan, pa defende nan coleganan cu awo ta bou investigacion penal y disciplinario.
For di momento cu e invitacion a sali, Polisnan a cuminsa vocifera nan mal contento pa e “heksenjacht” andando contra Polis. Tin miembro di SPA ta sinti cu politica ta purbando di mete den e cuerpo di Polis, specialmente den e investigacion rond di e portofoonnan. Si considera con e supuesto “keho” a drenta y kendenan ta su tras, anto no tin duda cu aki por papia di “willekeur”.
E reunion ta bin net un siman despues cu a atende un reunion caba cu Minister di Husticia, Siguridad y Migracion, mr. Andin Bikker hunto cu Alto Comisario Andrew Hoo y Comisario Vanessa Tjon. A elabora riba varios tema cu ta preocupando e sindicato.
Manera a publica riba nan pagina di Facebook, durante e reunion di mañan dialuna lo repasa e puntonan aki cu tur nan miembronan.
Un di e temanan mas cayente awor ta e rol di e Recherche Samenwerkings Team (RST) y nan intencion pa “cueste loque cueste” haya mas autoridad y independencia den conduci investigacionnan penal na Aruba sin pasa via Cuerpo Policial Aruba. De facto, nan kier ta un di dos cuerpo arma banda di KPA. Minister tabata cla pa firma e protocol cu Hulanda, pero danki na Parlamentarionan Tjon y Candelaria a wanta esaki cu no a firma ainda. Pero, cu e ultimo desaroyonan, ta mustra cu ta purba awor pa mancha e bon nomber di e recherchenan di Departamento di Crimen Organisa, pa asina mustra e importancia pa RST por traha independiente di nan.
Polisnan ta convenci cu aki ta trata di un “set-up” contra recherchenan di Cuerpo Policial Aruba y no lo laga e asunto aki pasa sin mas. Diasabra anochi a interoga e tres recherchenan te den oranan lat di anochi na Landsrecherche cu awor tin mannan yen di investigacion contra miembronan di Cuerpo Policial Aruba.
