Ku e estreno ayeranochi den The Cinemas di e pelíkula ‘Bohemian Rhapsody’ fundashon Ride for the Roses por wak bèk atrobe riba un evento eksitoso pa rekoudá fondo.
E suma di alrededor di 20 mil florin ku a rekoudá ayeranochi – na kaminda pa e di-15 edishon di Ride for the Roses – ta na benefisio di Fondo Prinsesa Wilhelmina ku ta hasi asina bon trabou riba tereno di lucha kontra kanser i guia di pashèntnan di kanser i nan famia.
E sine nobo di teater Bohemian Rhapsody, ku e siman aki a kuminsá drei den algun siudat Europeo i ku for di awe numa nan ta kuminsá pasa na Merka, ta konta di e bida di e legendario banda Britániko di rock Queen ku Freddy Mercury komo nan kantante. E último aki a nase komo Farrokh Bulsara dia 5 di sèptèmber 1946, na Stone Town, Tanzania. Despues ku el a muda pa Inglatera su pashon pa músika a sali na kla. Su koleganan studiante Brian May i Roger Taylor tabata en buska di un kantante pa nan banda. El a ofresé pa su mes i esei a bira e banda Queen. Farrokh a kambia su nòmber pa Freddy Mercury i e banda a kuminsá komponé piesa. Despues di seshonnan largu di grabashon pa Bohemian Rhapsody nan a bin tende ku e piesa aki ta muchu largu i nunka e lo bira un éksito. Kontrali a pasa. Queen a bira un di e bandanan di rock mas grandi na mundu ku a saka hit tras di hit. Na 1985 e banda a presentá ku éksito na e legendario konsierto di Live Aid. Nan a konstatá ku e kantante Mercury tabatin aids. Dia 24 di novèmber 1991 el a fayesé na Londres.
Promé ku a pasa e sine, presidente Robbin Martina di e fundashon Ride for the Roses a gradisí den e dos salanan tur esnan pa nan presensia; di pursi, nan tabata dispuesto pa gasta mas ku normal pa e pelíkula, simplemente pa sirbi e bon kousa. E survivor di kanser e músiko Betto Betrian a konta e sala kon na dos okashon el a haña tratamentu i a kura di kanser na garganta. E promé be tabata 20 aña pasá. E tokamentu a yud’é den su rekuperashon. El a elogiá e trabou di PWF i a rekomendá ku tin kanser pa no want’é p’e mes, pero pa kompartí esei ku otronan. Entre e wéspetnan a rifa un kurason trahá di palu di SunchiCuraçao, un bale di Kooyman, un pakete di Alcolada Glacial i unu di Curaloë.
Ride, Swim & Walk for the Roses
E siguiente aktividat públiko ta dia 20 di yanüari, Golf for the Roses, siguí pa e evento grandi mes djadumingu dia 27 di yanüari awor ora ta antisipá atrobe den kareda di 10.000 partisipante pa tuma parti na e di-15 Ride, Swim & Walk for the Roses.
