Riba, 1 di novèmber 2018, Partido Alternativa Real (PAR) a skohe un direktiva nobo. Miembresia atrabes di un elekshon a skohe un presidente i 8 miembronan di direktiva.
Pa medio di aklamashon, miembresia a skohe sr. Gerold Rach komo Presidente di Partido PAR pa e periodo 2018 pa 2020. Dokter Rach tin un trayektoria largu den PAR i durante diferente periodo a yega di sirbi den diferente funshon komo miembro di direktiva di PAR. Den su prome diskurso komo presidente nobo señor Rach a indiká kiko ta su vishon pa ku direktiva di partido PAR i ku mester traha duru pa e partido sigui krese na bienestar di komunidat di Korsou.
Durante di e reunion general, e direktiva saliente segun statuto a duna relato di e aktividatnan i situashon finansiero di e aña 2017 i tambe a presentá presupuesto pa e aña 2019. Ademas miembresia a skohe miembronan nobo pa e organo di konseho di partido (adviesraad).
Lider Politiko señor Eugene Rhuggenaath, a propone na reunion general pa aseptá señora Zita Jesus-Leito (presidente saliente) komo “Immediate Past President”. Un funshon ku ta konosi den clubnan di servisio . E funshon aki ta enserá duna sosten na lider polítiko, guia na e presidente nobo i tambe sosten riba e área di liderato na e direktiva.
PAR su direktiva ta konta ku 13 puesto inkluso esun di lider polítiko. Despues di e elekshon ku a tuma luga ayera nochi siguiente personanan lo forma parti di direktiva di partido.
Eugene Rhuggenaath
William Millerson
Emmilou Capriles
Zita Jesus-Leito
Ana Maria Pauletta
Kimberly Ascencion
Juvira Briceño
Giovanny Obispo
Gunnar Louisa
Malvina Cecilia
Shaheen Elhage
Tsz Ming NG
Direktiva saliente ta desea kada un ku a keda elegí hopi sabiduria i determinashon pa asina enfrenta tur e desafionan ku Kòrsou su mundu polítiko konose i sigur hasi lo máksimo pa sigui riba e kaminda pa hiba Partido Alternativa Real dilanti.
