Campeonato Heineken fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua riba veld di Dragon Hitters.
Den categoria A-Klas nos ta den fase finalisando di dos buelta unda pronto playoff lo inicia y equiponan bringando pa nan posicion den clasificasion. Tanto Black Joker como Piratas nan puesto den playof ta garantisa pero e posicion mester wordo determina ainda. Black Joker ta pica ariba 1-0 den bom di promer inning y ta amplia cu 5 careda mas den bom di 3 inning. 
Piratas ta reaciona den cabez di 4 cu 2 careda pero ta keda cortico. Boxscore final Black Joker 8 careda, 10 hit, 1 error y ta laga 6 coredor na base. Piratas 3 careda, 5 hit, 3 error y ta laga 5 coredor den circulacion. Mihor bateadornan pa Black Joker ta Xiovon James di 4-2 incluyendo un cuadrangular mas 3 rbi, Roderick Simon di 1-1 cu un doblete, Brian Courtar di 2-1 cu un homerun mas 3 rbi, Gioshua Maduro 2-2, Ashwi Feliciano 2-1. Pa Piratas a destaca na bate Franny D’Oleo 3-2 cu un triple y Oneal Smith Taveras di 1-1 cu un triple mas 2 rbi.
Brian Courtar ta enfrenta 18 bateador den 4 inning lansando 18 bola, 35 strike pa un total di 53 pitch permitiendo 3 careda tras di 4 hit regalando 1 base por bola pa asina seya e victoria riba su nomber. Eldrick Maduro ta drenta di relevo y no ta permiti careda pa haña un wega salba riba su nomber. William Benitez di Piratas ta bay cas cu e derota enfrentando 29 bateador den 5 inning tirando 33 bola, 52 strike pa un total di 85 pitch permitiendo 8 careda limpi tras di 10 hit propinando 5 ponche y ta regala 3 base por bola. Playoff di A Klas ta “ON” dialuna awor riba veld di Pos Chiquito unda pa 715 pm Black Joker lo enfrenta Logros y pa 9pm White Joker vs Piratas. Ambos weganan di playoff sen serie di best out of 3. Jega tereno bin apoya Bo equipo preferi!
