Dialuna awor ta tuma luga un otro ceremonia di huramentacion. E actual Presidente di Parlamento, cu a sinta desde dia 27 di october ultimo, Guilfred Besaril, ta tuma retiro di Parlamento y ta huramenta como Minister Plenipotenciario di Aruba na Hulanda. Ora cu e sali automaticamente ta habri un espacio, cu ta wordo tuma dor di Sue-Ann Ras. E ceremonia ta tuma luga dialuna awo pa 2:30pm.
Sue-Ann Shamira Juliette Ras, di 42 aña di edad, biba na Savaneta, ta mama di 4 yiu, esta 3 yiu muhe (1 adopta) y 1 yiu homber. El a studia “Fashion Marketing & Merchandising” na International Fine Arts College na aña 1993. Na aña 1998 a studia na Instituto Pedagogico Arubano (IPA) como “Docent 3de graads”, mientras cu na 2002 a studia na IPA atrobe pa “Docent 2de graads” specialisa den nos idioma Papiamento.
Su experencia di trabou a cuminsa na aña 1995 na Warner Bros Studio na Miami como Assistant Manager, sigui despues como docente pa SKOA na Colegio Cristo Rey den 2de klas. Desde 2003 e ta un redactor tambe di e revista Focus. Na aña 2005 el a cuminsa duna les di papiamento na Filomena College MAVO y tambe a fungi como Coordinator Ciclo (Ciclo Avansa Coordinator). Entre aña 2010 y 2013, el a fungi como “Freelance Writer” na Tera Group N.V. Entre 2011 y 2013 13 el a traha como “Coordinator & Docent van programma Recapacitacion di Papiamento” na IPA. For di aña 2013 e ta docente tambe di Papiamento na Middag-Avond MAVO na Abraham de Veer School na San Nicolas. Tambe mester menciona cu desde aña 2016 te awo, e ta traha na Examen Bureau Aruba como “Toets Controle Deskundige” pa Papiamento di scolnan MAVO y EPI Sector Hotel & Turismo.
El a participa den eleccion pa prome bez na September ultimo riba lista di MEP y a logra no menos di 362 voto individual.
Pa loke ta Guilfred Besaril, kende originalmente ta un Polis, a drenta sindicalismo y desde aña 2013 ta milita riba lista di MEP pa cual el a drenta Parlamento. Den e ultimo eleccion, su votonan a baha te na 508. Dialuna e lo huramenta como Minister Plenipotenciario, cu ta staciona na Den Haag, Hulanda.
Ta bon pa splica cu un Minister Plenipotenciario no ta un “Minister” igual cu e otronan pasobra e no ta responsabilisa na Parlamento, sino ta raporta directamente na e Minister Presidente. E ta forma parti di Conseho di Minister di Reino na Hulanda pero no ta forma parti di Conseho di Minister di Aruba. Por invite pa atende si ta necesario.
Guilfred Besaril ta reemplasa Juan David Yrausquin, cu a tuma e funcion over despues cu Alfonso Boekhoudt a tuma retiro pa bira Gobernador di Aruba.
E lista di Minister Plenipotenciario ta data desde nos Status Aparte, ora cu John Merryweather a asumi e funcion como e prome GevMIN di Aruba entre 10 di januari 1986 pa 11 di februari 1989 y a representa partido PPA.
E di dos a bira Roland Lacle di partido MEP entre 9 di februari 1989 pa 7 di maart 1991, sigui pa Ella Tromp-Yarzagaray di MEP entre 8 di maart 1991 pa 1 di maart 1993. Candelario “Booshi” Wever di MEP a sinta riba e stoel ey desde 2 di maart 1993 pa September 1994. Partido AVP a tuma e posicion ey pa prome biaha na September 1994 dor di Mito Croes, cu a sinta te cu 30 di october 2001. Ella Tromp-Yarzagaray a bolbe asumi e posicion dia 30 di october 2001 pa 7 di november 2005, sigui den e di dos termino dor di Frido Croes entre 8 di november 2005 pa 31 di october 2009. Dia 1 di november 2009, Edwin Abath di AVP a asumi e posicion den Gabinete Mike Eman te cu 13 di november 2013, ora cu Alfonso Boekhoudt a tuma over dia 14 di november 2013 te cu 1 di november 2016. Dia 16 di november 2016, e actual Minister Plenipotenciario, Juan David Yrausquin ta sinta riba e stoel ey, probablemente te cu e siman aki ora cu Guilfred Besaril tuma over como e di 11 Minister Plenipotenciario di nos pais. Por nota cu prome cu e Gobierno di MEP na 2001, casi tur Gobierno di coalicion tabata cay prome cu tempo y no ta alcansa 4 aña completo. Ta desde 2001 ta nota cu e terminonan tabata 4 aña completo. Por nota cu den historia ta Ella Tromp-Yarzagaray so a ocupa e puesto na dos ocasion.
