Henter dia awe e condicionnan di tempo tabata masha favorabel pa un bon awasero. For di marduga pa mainta caba tabatin awasero y awenochi atrobe awasero a presenta den gran forma. Presencia di strena cu lamper a causa cu varios bario ta sin coriente.
Pronostico di tempo
Di acuerdo cu e pronostico di tempo di Meteo Aruba, emiti diasabra 5:00pm, a pronostica cu awe diasabra anochi shelo lo ta parcialmente nubla cu chens pa un awasero breve den marduga y riba diadomingo tempo lo ta parcialmente nubla cu chens pa awasero local.
Potret saca un rato pasa den e districto di Santa Cruz dor di Lysander “Manolo” Besselink
Meteo a splica cu un disturbio na diferente nivel di atmosfera den Caribe central ta moviendo poco poco dor di region local. Esaki ta haci cu pa e siguiente 24 oranan e condicionnan atmosferico ta keda favorabel pa formacion di mas nubia temporal den region local. Pa e motibo aki tin mas chens pa awasero, cu posibilidad di lamper cu strena.
Varios area sin coriente
Pa loke ta e situacion actual, lamper a corta den diferente bario, for di San Nicolas pa Noord cu consecuencia di tin varios bario sin coriente. Como cu awasero ta yobiendo y lamper ta cortando keto bay, ta masha dificil y peligroso pa NV Elmar subi caya y bay traha riba kabelnan di coriente awor. Mester warda e mal tempo pasa pa tecniconan por activa y reconecta suministro normal di coriente.
