Durante e Town Hall Meeting organisa pa Camara di Comercio diaranson anochi na Centro di Bario Dakota, ta varios punto a bini padilanti, relaciona cu inkietud nan cu ta biba den comercio. Berend Prenger tabata un di e comerciantenan presente y a vocifera cu e forma con ta atende cu comerciante ta masha malo. Gobierno no ta eficiente y ta obstaculisa hacimento di negoshi.
E comerciante Hulandes-Europeo a conta cu e mes a bini for di Hulanda mas o menos 7 aña pasa y constantemente e ta casi casy for di su stoel ora e analisa con ineficiente Gobierno ta funciona. E ta haya cu mester haci Camara di Comercio mester bira central pa tur asunto di negoshi. Awor aki, pa Bo habri Bo compania, Bo lo mester meld Bo mes na Servicio di Impuesto y na Departamento di Asuntonan Economico. Haci mas servicio digital, pasobra awor aki e ta tuma hopi tempo y ta tarda pa haya contesta y e permisonan necesario. Ehempel bibo ta cu pa kico cu ta, ta exigi pa cumpra zegel pa por haya un servicio di Gobierno, siendo cu e departamento ey t’ey pa sirbi pueblo. E ta critica cu pagamento so no ta e problema, pero e servicio malisimo cu ta haya bek, ta duna Bo e sentimento cu Bo ta pagando pa un mal servicio pa colmo.
E comerciante ta haya tambe cu e departamentonan di Gobierno mester cuminsa traha mas cu otro. Locual nan ta haciendo awor ta un estilo di manda Bo di cashi pa muraya. Ta pasa mucho biaha cu Bo ta bay pa un servicio y e empleada ta djis contesta Bo cu esun cu mester atende Bo ta cu vakantie awor, bin bek aki tres siman.
Berend Prenger a termina consehando Camara di Comercio pa hunga un rol mas activo den e proceso aki di conseha Gobierno miho riba e nivel di servicio na comercio. E ta kere cu Camara di Comercio mester presenta cu un plan realistico na Gobierno pa nan bira un “one stop shop” pa tur asunto cu ta regarda comercio, tur permiso y licencianan necesario pa opera un negoshi na Aruba. E cuenta di bay di un caminda pa e otro no ta eficiente y asina no ta promove hacimento di negoshi riba nos isla tampoco.
