Awe tabata e prome Town Hall Meeting y a scoge Centro di Bario Dakota pa ta e sitio pa topa comerciantenan actual y futuro comerciantenan. Meta di e evento tabata pa scucha for di comercio kico ta biba eyfo, nan sugerencianan y hasta critica si por tin.
Henter e directiva di Camara di Comercio a sinta riba scenario pa scucha e publico, cu lamentablemente no tabata mucho grandi. Pero esunnan cu a presenta a haci hopi pregunta y Camara di Comercio awor tin un miho idea di e retonan cu tin den comercio.
Ernst Mohamed, Presidente di Camara di Comercio ta considera e evento exitoso. E ta haya cu el a bay bon y e inkietud di comerciantenan ta specialmente riba nos sistema di belasting, ilegalidad y “vraag en aanbod”. Camara di Comercio no tabatin tur e puntonan aki riba nan lista di prioridad y importancia pero awor cu a haya e feedback aki di comerciantenan, a dicidi mester cu lo enfoca mas riba e puntonan aki.
“Esaki ta e prome biaha cu nos ta haci un Town Hall Meeting y ya cu nos a mira cu tin asina hopi hende, nos lo purba haci’e, pero tambe cu Parlamentarionan, Hefenan di Departamentonan di Gobierno cu ta atende cu comercio, pa nan por duna contesta y trankilisa e inkietudnan cu tin eyfo of suministra informacion”, asina Ernst Mohamed a expresa.
El a splica cu den directiva a tuma e decision pa organisa e evento aki pasobra intercambio di informacion semper ta importante y hasta necesario. En bes di tende di un of dos persona, a opta pa organisa un reunion grandi den cual a invita mas hende pa duna un bista cla di kico ta pasando den comercio. “Y mi tin cu bisa cu tin hopi cos cu ta pasando cu ta duna hende toch e temor pa cuminsa cu un negoshi. Esaki ta net lo contrario di e plannan y meta di Camara di Comercio”, segun Presidente di Camara di Comercio a subraya.
Ernst Mohamed a admiti cu semper tin cosnan cu por ta desagradabel, nos sa cu tin cosnan cu diferente departamento di Gobierno mester traha riba nan, esey ta tarea di KVK, pero awor ta nos deber pa sigui pusha riba e cosnan aki. Di otro banda el a confirma cu Gobierno ta haciendo su best si pasobra di e “white paper” di Camara di Comercio di aña pasa, ya e Gobierno aki a tuma varios di nan over y ta trahando riba nan.
Ta trahando por ehempel riba E-Commerce y E-Portal. Tambe ta intencion di Gobierno pa promove pa mas departamento traha hunto cu otro. “E ta fastioso, e ta time consuming, si Bo mester busca 10 diferente papel na 10 diferente departamento. Esaki ta mustra inefectividad y Gobierno no por gana placa, ni spaar, ni haci e cosnan manera Bo kier haci. E cos ta pa tur hende traha mas eficiente pa nos comercio por crece”, segun Ernst Mohamed.
Na final Ernst Mohamed a bisa di a skirbi 2 pagina completo di notulanan di puntonan di atencion. A ripara cu varios di e puntonan ta bin bek padilanti, pues cu ta biba den comercio. Cu e informacion riba mesa, awor directiva tin puntonan pa traha riba dje. Meta di Camara di Comercio ta pa laga comerciantenan traha cu smaak, pa nan bende, gana placa y pa nan crece. Y no cu mester tin temor cu tin tanto ilegalidad pasando den comercio y cu ta stroba comercio pa desaroya y progresa.
