Banco Central di Aruba (BCA) a tuma nota di e decision di dia 4 di juli 2018 tuma door di e Corte den Promer Instancia di Corsow, cual ta basa riba un peticion di Centrale Bank van Curaçao en Sint Maarten (CBCS).
Corte den Promer Instancia di Corsow a dicidi cu e control di emergencia (e asina yama “noodregeling”) ta aplicabel riba e companianan estableci na Corsow, esta, ENNIA Caribe Leven N.V., ENNIA Caribe Schade N.V., ENNIA Caribe Zorg N.V., EC Investments B.V., y ENNIA Caribe Holding N.V. (despues yama conhuntamente: ENNIA Corsow).
E companianan estableci na Aruba, esta ENNIA Caribe Leven (Aruba) N.V. y ENNIA Caribe Schade (Aruba) N.V. (despues yama conhuntamente: ENNIA Aruba), y Banco di Caribe (Aruba) N.V. (BdCA) ta forma parti di e grupo di ENNIA. Sin embargo, ENNIA Aruba y BdCA ta instancianan Arubano cu ta huridicamente independiente y cu tin nan mesun propiedadnan, inversionnan, y capital.
E control di emergencia cu por medio di e decision di Corte den Promer Instancia di Corsow a wordo declara aplicabel riba ENNIA Corsow no ta aplicabel ni riba ENNIA Aruba ni riba BdCA. Aunke BCA no por duna informacion tocante ENNIA Aruba y BdCA, basa riba su deber di confidencialidad, BCA ta haya importante pa informa e publico cu BCA ta vigila den un forma estricto e cumplimento continuo di e ley- y regulacionnan vigente di e institucionnan bou di su supervision y ta sigui di cerca e desaroyonan encuanto ENNIA Corsow.
BCA tin diferente instrumento na su disposicion, basa riba e legislacion di supervision vigente, cu e por aplica na momento cu e ta constata cu un institucion bou di su supervision no ta cumpli cu e ley- y regulacionnan vigente.
BCA ta enfatisa cu e lo aplica e instrumentonan legal cu e tin na su disposicion si e situacion ta exigi esaki, cu e obhetivo pa sigui salvaguardia e interesnan di aseguradonan y depositornan.
