Awe mainta, den ausencia di e acusado, esta e Polis Jadira Vriend y den presencia di mayornan di e victima Zinnia Croes, Corte a anuncia su veredicto den e accidente fatal di dia 13 di maart 2015. Corte no a haya proba e prome acusacion contra Jadira, esta cu el a stuur auto bou influencia di alcohol causando un accidente fatal. Esaki pa motibo cu Corte no por uza prueba di e test di alcohol cu a wordo haci cun’e, pa motibo cu el a pidi un contra prueba y Polis no a haci esey pa motibo cu no tabatin e material disponibel. Y tampoco a keda proba e acusacion subsidiario, cu ta encera e test di alcohol cu no por wordo uza tampoco.
Corte a haya proba si e di dos acusacion, cu el a stuur auto den forma malo (iresponsabel) y a causa un accidente unda a alcansa un mucha di 12 aña kende a fayece despues. Hues a bisa cu ora un chauffeur mira un mucha canando banda di caminda no solamente mester baha velocidad, brake, pero tambe keda mira kico e mucha ta bay haci.
Den e caso aki e acusado no a baha velocidad door di brake, el a solamente kita pia di e pedal di gasolin y si e ta kere na 70 pa 80 KM pa ora e velocidad no ta baha. Ademas si el a keda mira e mucha, e lo a constata cu e hobencita a mira na ambos banda di caminda dunando indicacion cu e ta bay crusa caya. Pero e acusado no a ni mira esey. Tambe e glas ta getint di tal forma cu e ta stroba visibilidad y esaki tambe tabata motibo cu e mester tabata extra cauteloso ora cu el a mira e muchanan banda di caminda.
Hues a bisa cu esaki por ta hopi fastioso pa e mayornan pero Corte no por haci nada otro cu bay di acuerdo cu loke Fiscal a pidi cual ta 240 ora di trabou pa comunidad, 24 ora di un curso of 120 dia cera y pa 2 aña e no mag stuur auto.
