E reapertura di e refineria ta birando cada dia mas scur. Esaki ta pa diferente motibo. Cos ta hopi malo den refineria. No tin nada pasando mas eyden. CITGO no por cumpli cu ningun pago. Di October cu November bin ariba debe tur contratista hopi placa. Tin contratista a notifica nan trahadornan caba cu nan tin cuater luna sin mira placa. Pesey mes e trahadornan por conta cu nan lo no ricibi nan siguiente salario.
No tin placa y parce gobierno no ta worry tampoco. Esnan di PDVSA of CITGO den un of otro forma, a pidi gobierno pa bay papia cu Merca pa e embargo. Gobierno ta laba man bisa cu ta Hulanda. Mas cu 100 hende trahando cu e contratista. Awor aki tur cos ta paraliza den e refineria. E refineria ta manera Zombie paden. E cos aki ta bay bolter. E ta parce cu e strategia aki ta loke gobierno kier tambe. Contratistanan tin basta dia ta busca manera di haya contacto cu gerencia di CITGO na Aruba pero no ta tende nada. Luis Marquez, cu ta amigo di Minister Glenbert Croes y Patrick Faro, ta e persona cu ta rond e refineria despues cu Ray Buckley a bay.
Ray Buckley ta unico cu por a salba nan pasobra e ta pone tur hende riba mesun liña. Ray Buckley ta pensionado cu experiencia grandi y awe a ser manda cas. Informacion di paden cu ta yegando ultimo momento ta bisa cu Diahuebs, Citgo a manda yama su empleadonan bek pa bin Merca. Mericanonan ta preparando pa bay for di Aruba y a haya instruccion pa bay for di Aruba mas pronto cu por. E compania ta duna impresion di kier bay for di Aruba sin cumpli cu e pagonan na e contratistanan local.
For di representante di empleadonan di CITGO Aruba y empleadonan di contratista nos ta hayando informacion di loke ta pasando. Dimes nan tin miedo di represaya. Trahadornan ta lanta tur dia cu un inseguridad grandisimo. CITGO tin 3 pa 4 luna sin ta pagando contratista. Hasta tin algun cu ya caba a stop di ofrece servicio. Algun ta den pleno preparacion pa bancarota y algun no tin e idea cu CITGO no por cumpli mas cu pago.
Empleadonan di CITGO Aruba no por ni haya un prestamo na banco. Esaki ta pasobra CITGO no tin garantia pa e trahadornan. Awor aki e trahadornan ta bibando di un salario pa e siguiente salario sperando un mal noticia.
Gobierno ta keto keto, comosifuera cu nan no kier bisa nada pero e bom a explota.
Minister Glenbert Croes cu su departamento a sa di mete nan mes den refineria pa saca e compania cu tabata stabil. A nombra hende y saca otronan for di refineria pa hinca su amigonan. Aki tampoco por cover salario casi di e amigonan di Glenbert Croes den e refineria. Trahadornan kier sa unda minister Glenbert Croes ta awor cu berdaderamente tin problema?
Unda minister presidente ta pa exigi CITGO cumpli cu su debernan. Voral na e companianan cu a presta servicio local y no ta wordo paga. Minister Glenbert Croes ta papia di Arubiano, pero ta puro Mericano tin ta cana den refineria.
Manera ex minister Mike de Meza a splica, Nan tin cu simplemente habri e contrato y forsa CITGO cumpli.
CITGO no tin placa pa paga contratista y ta simplemente pasobra gobierno no ta bay Merca pidi alivio di e sancionnan pa CITGO manda placa pa cumpli cu su debernan.
E trahadornan a splica, con bo por spera un hende traha duro y nunca wordo paga?
Pa prome biaha henter e famia Croes y MEP mester pone nan interesnan un banda y traha pa bon di pueblo y no otro interes segun e trahadornan.
CITGO Aruba ta preparando carta di terminacion pa tur empleado y contratista. Citgo Aruba no tin placa pa paga y ta forsando empleadonan bin traha via contratista pa despues no paganan for di October / November.
Empleadonan di contratista lo haya noticia den un of dos siman cu nan mester bay cas. Algun a caba di cumpra auto, otro cas y ya caba bo ta nota tristesa y preocupacion.
Sigur 100 pa 200 hende lo mester bay cas den forma abrupto.
Sancionnan Americano ta stroba CITGO Corporate di manda placa Aruba.
E compania Doushar a informa su empleadonan di no por paga salario diabierna.
Motibo ta cu CITGO tin cuater luna sin paga. Ademas di no ta paga contratista, nan debe gobierno algun miyon florin cu ta poni den nan contrato. E trahadornan di Venezuela ya caba lo mester bay bek y dimes esunan di Merca ta wordo yama pa bolbe Merca. Si gobierno a mustra un tiki interes manera nan tabata grita tempo di opocision, e cos por tabata diferente. Tristo con nan tabata grita cu nan por habri e refineria y tin hende pa habri esaki, y awe nan ta keto keto.
No ta move ni un dede pa asina garantiza un reapertura. A campaña y mobilize hende cu ora cero na Main Gate. Glenbert Croes den opocision a usa frasenan di su tata defunto, y awe ta tristo pa mira con e ta actua relaciona cu e refineria. Ki ora bise algo, e ta core bisa cu ta Evelyn Croes prome minister ta responsabel. Awor ta cuestion di warda e noticia tristo cu lo drenta y asina oficialmente bisa ayo na CITGO.
