Resientemente Minister Marilyn Alcalá-Wallé komo titular di Deporte a duna rekonosementu na e tim di hóben di natashon artístiko Banda Bou Splash.
E atletanan ku a partisipá na e kompetensha di Worldwide Novice Intermediate na Florida a wòrdu di pen ku bandera di Kòrsou komo e “Bon Yu di Kòrsou”. Di e forma aki Gobièrnu di Kòrsou ta mustra gradisimentu na e hóbennan pa nan aporte na nos pais.
Banda Bou Splash a sali Kòrsou ku un delegashon di 14 atleta, 2 coach, 1 lider di delegashon 1 asistente i algun mayornan ku a asistí. E kompetensha a keda deklará e aña aki pa ta un kompetensha ofisial mundial pa atleta nan nobato. E tim a destaká na Florida i a regresá ku 14 sinta, 7 medaya di bròns, 5 medaya di plata i 9 medaya di oro. Tambe un overall Winner.
Banda Bou Splash tin komo meta pa sigui krese den e deporte landamentu artístiko, kompetí internashonalmente i sigui ofresé e posibilidat na mas hóben pa por praktiká e deporte di landamentu artístiko. Un pabien un biaha mas na nos deportistanan ehemplar.
