Dialuna 20 di juni Parlamento ta bay trata e ley “Normering Topinkomens”. E ley aki supuestamente mester regula, miho bisa baha e salario di e funcionarionan halto den sector publico y semi publico, manera e companianan estatal y otro instituto cu gobierno tin influencia riba nan maneho.
Lider di fraccion di AVP, mr. Mike Eman ta bisa cu su fraccion ta contra e ley aki pa diferente motibo. Pa cuminsa Eman ta bisa cu no ta esunnan na cabes so di e companianan y institutonan lo sinti e efecto. Cu tempo henter e structura di salario lo ta afecta, di esunnan na cabes te esunnan den funccion cu hopi menos salario den e compania-, fundacionnan- y institutonan aki. Esaki ta mr. Mike Eman su analisis despues di a scucha y a haya diferente presentacion di WEB, Elmar, SETAR, AAA, Banco Central y ATA y e conseho di Raad van Advies.
Raad van advies ta bis’e hopi cla: “De Raad merkt op dat de neveneffecten van het voorstel niet alleen functionarissen met een hoge functie kunnen betreffen, maar ook het loongebouwe en de organisatiestructuur als geheel zullen raken”. Mas cla e no por ta, segun mr. Mike Eman, locual Raad van Advies ta adverti pe ta cu e ley aki no ta e Director so finalmente su salario lo keda reduci, pero por ehempel na WEB, Elmar of Setar di e director te pa e electricien y esunnan den mantencion, na Banco Central, APFA, AZV, ATA, AAA di e director te cu e administrador, secretaria y e bode”, tur lo biba e consecuencia di e ley aki.
Eman ta bisa cu tur instancia envolvi y cu fraccion di AVP a consulta tur ta teme tambe cu 1. Perdida di e profesionalnan den e compania- y institutonan aki y debilitacion di e empresa- y institutonan door di esaki; 2. Perdida di oportunidad di trabao atractivo p’e profesionalnan na Aruba y esunnan studiando cu nos kier bek; 3. E compania- y institutonan aki lo no por competi mas pa profesionalnan pa fortifica y garantisa calidad y progreso di nan operacion, e profesionalnan lo scoge pa sectornan cu si por ofrece ocual ta nan balor; 4. Finalmente e compania- y institutonan aki lo bay atras, gerencia y empleado lo bay atras, calidad di maneho y operacion lo bay deteriora y Aruba den su totalidad lo sali perdi.
Lider di fraccion di AVP, mr. Mike Eman ta lamenta cu den tur e proceso aki ta mira tambe un campaña di Gabinete Wever Croes pa stigmatisa e funcionarionan di e institutonan aki, cu ta nos profesionalnan. Eman ta bisa cu nos mester para keto y pensa con excepcional e ta cu na un isla chikito manera Aruba cu apenas 100.000 habitante e maneho y operacion di e insitutonan hopi complica den nan tarea y operacion, manera Banco Central, APFA, AZV, WEB, ELMAR, SETAR, ATA, AAA ta carga 100% p’e gerente- y empleadonan local. “Profesionalnan di tur nivel di nos sociedad ta carga e companianan aki door di tempo dificil y haci cada un di nan cumpli cu nan tarea primordial na un manera sumamente profesional”, mr. Mike Eman ta enfatisa. E ta lamenta cu Gabinete Wever-Croes no ta importa e daño cu e ta causando cu e ley aki. Segun Eman e temanan aki mester a bay na mesa di un Dialogo Social pa a yega na otro areglo, pero atrobe Gabinete Wever-Croes ta impone ley inhusto y iresponsabel riba pueblo.
