Diamars Aruba a haya den su scochi atrobe e anuncio for di Minister di Asuntonan Economico mr. Geoffrey Wever tocante otro aumento den e prijs di gasolin riba nos isla. Un cambio cu, manera ta custumber, tin su efecto domino den henter e cadena di suministro y servicio, afectando hunto cu ne, e poder di compra di e ciudadano.
Partido di Pueblo Arubano, AVP ta responsabilisa Prome Minister mr. Evelyne Wever Croes di a kita e descuento di 10 cen pa liter di gasolin cu tabata vigente te na 2017 durante Gabinete Mike Eman I y II. Kitando e reduccion aki ta haci cu Gabinete Wever Croes no por laba man sin mas awe y bisa cu e aumento ta netamente internacional. Tambe Gabinete Wever Croes a aumenta e BBO di 3% pa 7%. Ta paga e 7% aki den dos schakel riba gasolin. E schakel di FEMSA/RDA pa e gasolin station y di gasolin staion pa e cliente. Tur esakinan si ta medidanan di gobierno cu awe ta haci e prijs di gasolin mas caro ainda cu unicamente e efecto internacional. P’esey mr. Evelyne Wever Croes ta responsabel pa e castigo aki cu Pueblo ta pasando aden.
Ta e medidanan aki di mr. Evelyne Wever Croes ta locual ta haci cada aumento internacional mas severo ainda y pisa pa pueblo. ta bisa cu su gobierno a laga di cobra 12 miyon pa aña na e 10 cen di descuento aki 8 aña largo pa pueblo haya un alivio, practicamente 100 miyon a laga den saco di pueblo y e prome cos cu Evelyne Wever Croes a haci ta kita e descuento aki di pueblo y riba dje subi BBO di 3% pa 7% locual ta dal pueblo den dos schakel, 14% ariba dje.
“Tur aña tabata sacrifica di nos gabinete 12 miyon florin pa por a subsidia cu e 10 cen aki y un di e prome medidanan cu Gabinete Wever-Croes, cu den campana a bisa cu lo baha gasolin, tabata di kita e descuento di 10 cen aki,” asina e lider di oposicion, mr. Mike Eman a indica. “Den e contexto aki Gabinete Wever-Croes ta carga un responsabilidad directo pa e peso di e gasolin cu ta asotando nos pueblo y cu awe ta asota atrobe nos comunidad.”
Tabata un iresponsabilidad di MEP, pa den tempo di campaña priminti di lo baha gasolin, sabiendo cu esey ta practicamente imposibel y ainda ta wardando e barco di Glenbert Croes cu gasolin barata yega. Obviamente tabata djis promesa fofo cu MEP a haci. Loke si e gobierno actual por a haci tabata di mantene e descuento di 10 cen; algo cu AVP si a logra den tempo hopi mas dificil pa entrada di Pais Aruba. Tambe mester a exonera gasolin di e BBO di 7%, pero esey tambe ta bay den saco di Gabinete Wever Croes. “Insult on injury”, Eman ta expresa.
Den conclusion, e lider di AVP a recorda un y tur cu si awe na pomp di gasolin bo tin cu paga atrobe, corda cu 10 cen di e aumento aki y e 14% di BBO ta directamente culpa di Evelyn Wever-Croes y su medidanan.
