Ta parce cu porfin un parlamentario di MEP a sali dilanti y contradeci e declaracionnan di su propio ministernan. Por corda recien ainda den e caso di Nigel Maduro caminda un proces-verbaal a bira publico na momento cu a nota cu a pone preto riba blanco c’un personal di e oficina di Minister di Husticia, a yama e polis y bis’e p’e duna prioridad den e investigacion. E recherche den su proces-verbaal a pone cu el a haya un yamada sigui pa un mensahe riba WhatsApp for di e personal di e ministerio di husticia indicando p’e duna prioridad.
Den un estado di derecho, algo asina no ta aceptabel, caminda cu for di Cocolishi kier domina Cuerpo Policial y dicidi cua caso tin cu ricibi prioridad of no. A acerca e minister di husticia “himself” pa puntr’e riba e echo aki. Durante un entrevista exclusivo cu Minister Rocco Tjon, el a indica cu ni e y tampoco su coordinadonan a yama polis pa mete ni mucho menos pa pone presion. Su hefe, Minister-President, tambe durante un conferencia a indica cu “ta berdad” cu Minister Tjon no a yama polis y cu e por sigura cu ningun hende di Cocolishi ta yama polis pa pone presion. Segun Croes, su gobierno no ta traha asina. Ambos politico minister ta para riba nan punto cu locual ta para den e proces-verbaal no ta berdad.
Cu e declaracionnan aki, ta parce di un forma indirecto ta yama e polis pa gañado. E polis di fam Tromp den su proces-verbaal cu ‘mutatie nummer’: 727952 ta indica berdaderamente con cos a cana, cu ta for di Cocolishi a yama.
No ta un secreto cu no ta tur ora politiconan ta papia e berdad, sigur di e gobierno actual. Na mas di un ocasion a gara y confronta e ministernan cu declaracionnan cu no ta cuadra cu e berdad.
A dura exactamente algun luna ora cu e topa cu un ex-top funcionario di polis y actual Parlamentario di MEP, Alvin Molina. A puntra Molina si e ta na altura di e proces-verbaal y ken ta papiando berdad aki. Sea si su ex-colega ta gaña den e proces-verbaal of si ta su ministernan ta gaña. Molina ta bin di Cuerpo Policial y a para pa e polis. Molina a contesta bisando cu: “Minister a pidi specificamente pa Cuerpo Policial duna prioridad n’e caso.” Cu esaki, ta contradeci e ponencianan di tanto Rocco Tjon y Evelyn Wever-Croes.
No a importa Molina cu e ta di MEP, sino a para pa e berdad y indica cu t’e minister a yama. Mas aleu Molina a indica cu na final di dia t’e minister t’esun politicamente responsabel, pues si e minister mira cu tin un caso di momento cu mester mas atencion, ta normal p’e minister yama y pidi pa duna prioridad n’un caso specifico.
Loading…
Reload document 
Open in new tab Aunke cu den nos estado di derecho no ta permiti metemento di politica den husticia, Molina ta sinti cu esaki ta normal pa un Minister di Husticia, yama Cuerpo Policial y indica cua caso tin cu ricibi prioridad.
Abogado mr. Desiree Croes a entrega un keho oficial contra Minister Rocco Tjon, mirando cu den e proces-verbaal mas abou ta poni cu; e coordinado di e minister despues di pidi pa duna prioridad n’e caso a bay asina leu di bisa ken t’e posibel sospechoso, kende ta “Ruman di Desiree”.
Croes ta sinti cu esaki ta un persecucion politico di parti e minister contra su persona p’esey mes el a denuncia actonan no integro di Minister Rocco Tjon.
