E presencia di Aruba na Seatrade Cruise Global 2024, ta semper un paso significante pa fortifica colaboracion den e industria crucero y promove iniciativanan turistico cu e isla tin pa ofrece. ‘Ta sigui Reforsa e model di High Value, Low Impact’
Seatrade Cruise Global ta sirbi como un plataforma prominente pa conecta cu socionan nobo y existente, comparti conocemento y crea sinergia den e industria. Durante di e evento, Aruba hunto cu representantenan di Bonaire y Curaçao, a mustra compromiso pa cu inovacion y cresemento sostenibel.
Aruba Tourism Authority (A.T.A.) y Aruba Ports Authority (APA) a lidera reunionnan y interaccionnan impactante cu socionan clave, incluyendo diferente liña di crucero, oficial di Gobierno, y expertonan den e industria. Entre e discusionnan notabel tabata reunionnan, den presencia di Minister D. Oduber y Diputado C. Abrahams, cu representantenan di Bonaire y Curaçao caminda a subraya riba esfuersonan colaborativo pa cu desaroyo regional.
A.T.A. a participa activamente den un variedad di tayer y sesion caminda cu a toca topiconan di desafio y oportunidadnan clave den e industria pa asina re-afirma dedicacion na tendencia actual y miho practica di e industria di crucero. A.T.A. hunto cu APA a toca discusionnan fructifero cu Florida-Caribbean Cruise Association (FCCA), fortificando ainda mas e posicion di Aruba como un destinacion prominente den mercado di crucero di Caribe.
E delegacion di Aruba na Seatrade Cruise Global a consisti di Patrick Melchiors, Monica Bos, Jorgino Willems di Aruba Tourism Authority, y Marc Figaroa, Mario Arends, Rosie Arends di Aruba Ports Authority, cu a demostra nan compromiso, entusiasmo, y dedicacion pa representa e interes di e isla y promove e ofertanan unico na socionan den e industria.
Durante henter e evento, e ‘booth’ di Aruba, den colaboracion cu Bonaire y Curaçao, a sirbi como un hub pa provee informacion, crea conexion, y promove atraccion y experiencianan unico di e islanan ABC.
Seatrade Cruise Global 2024 ta sirbi como un testimonio firme pa cu e compromiso di promove practicanan di turismo sostenibel, aumenta cresemento economico, y reforsa socionan den e industria crucero, mientras ta ilustra e beyesa y hospitalidad unico di e isla. Tur esaki den línea cu e model di “High Value, Low Impact”.
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.
