Diahuebs anochi a tene un evento vigil di cende bela pa salba John Wesley College, cual scol lo cera final di e aña escolar aki. Tur esunnan cu a presenta, hunto nan a ilumina e caminda pa un futuro mas briyante pa e comunidad. E parlamentarionan como miembro di partido di AVP tambe tabata presente pa sostene e momento aki.
Participacion di un scol, manera John Wesley College, den un cadena di educacion ta hopi importante. Gobierno mester haci locual ta necesario pa mantene e scolnan habri. ing. Mike de Meza, parlamentario (AVP), a indica cu ta trata di 110-115 mil habitante tin na Aruba. E ta cuestiona e echo cu ta cera un scol. E ta tipifica e gobierno aki pasobra si esaki tuma luga na cualkier otro bario manera Santa Cruz, Tanki Leendert, e storia lo ta completamente otro. Eynan si nan lo a bolter tur piedra pa mantene scol habri. Pero pa San Nicolas no tin interes. Ta comosifuera San Nicolas no ta biba den nan curason.
Conny Aventurin-Connor, cabesante di Colegio Hilario Angela, a expresa cu el a topa hende cu a bay John Wesley na aña 1966, aña cu el a persona a nace. E emocionnan tabata hopi halto y hopi tabata puntra pakico San Nicolas, pakico John Wesley. E scol tabata uno cu yen di structura y awendia e muchanan mester di esey.
mr. drs. Arthur Dowers, parlamentario (AVP), a expresa cu San Nicolas merece extra sosten. El a indica cu tempo AVP tabata den gobierno, maske hopi hende tabata contra pa bin mas hotel, unda tabatin moratorium riba binimento di hotel. Nan a bisa cu esey no mag conta pa San Nicolas, pasobra nan mester haya un of mas hotel pa crea desaroyo pariba di brug. Momento cu a bisa di inverti den e Green Corridor, e parti grandi tabata pa trece y hiba e flow di trafico di San Nicolas hopi mas facil cu por stimula inversion na San Nicolas. E ta haya cu San Nicolas merece miho loke por mira awe.
Otami Thomasia, maestro, a indica cu algo asina por pasa cu cualkier scol. A mir’e caba den pasado unda e maestronan, e scolnan ta indica cu tin menos mucha, e klasnan ta cerando na diferente scol. E ta kere cu esaki ta comienso di un problema masha grandi cu tin na Aruba, ta mir’e na San Nicolas. Si no confronta e problema aki y mira e solucionnan clave, por mira cu esaki ta bay pasa den hopi scol na tur nivel di enseñansa.
Esaki no ta e señal cu nan kier riba nos isla, pero kier un futuro briyante p’e alumnonan. Thomasia ta di pensamento cu si ta bisa ta bay cera e scolnan, e ora no ta mira un solucion. Ta tuma e caminda facil y esey no por ta e señal cu kier pa Aruba.
mr. Mike Eman, lider di fraccion AVP, a indica di spera cu e conceptonan diahuebs anochi no yega solamente na gobierno y parlamento, pero tambe yega na gobernador –kende ta di San Nicolas. E ta kere cu e tema aki ta uno overschrijdend, pasobra henter comunidad ta envolvi den e tema aki. Na momento asina, gobernador di un pais tambe mester sinti e gritonan cu ta sali for di comunidad. Gobernador di un pais na momento asina cu tin un impasse, caminda no ta sali for di un situacion cu ta creando inkietud asina grandi den comunidad, e ta mira un rol importante pa Gobernador Boekhoudt tuma un paso y mira con pa salba e scol aki. Esey ta algo apropia (passend) pa un gobernador mester haci.
Wendrick Cicilia, hurista, a expresa cu e comunidad di San Nicolas a sali pa apoya algo cu ta di San Nicolas. Esaki ta parti di identidad di San Nicolas. Ora mira cu politico ta sali y purba desbarata un esfuerso di un hoben di San Nicolas, e ta lamentabel. E ta mustra un politico desespera y desorienta.
AVP no tabata eynan pa duna expresion politico, pero mas bien pa sostene e comunidad di San Nicolas, pa conserva algo cu ta pertenece na nan identidad. Diahuebs anochi por a mira e reaccion di e comunidad a presenta, ex-studiante, ex-maestro como esunnan actual a presenta., Hunto nan a manda un mensahe cla na gobierno riba e esfuersonan pa mantene e scol habri mester inicia y mester yega na mesa.
