Segun un noticia emiti riba television Hulandes, e pais cu mayor cantidad di refugiado pa habitante na mundo, un pa cada 6 habitante, ta Aruba. Sigui pa Libanon na di dos luga cu un riba cada 7.
Loke tambe ta nifica cu nos tin e costonan di infrastructura mas halto na mundo pa acoge e refugiadonan aki. Pero esey parce no ta preocupa nos gobierno tampoco e miembronan di parlamento di Aruba.
E costonan di infrastructura ta paga cu belasting asina ta, pakico ningun hende no ta keha, ta loke Milton Ponson, presidente di Rainbow Warriors Core Foundation, a cuestiona.
Segun Ponson, tin cu purba di compronde ora cu ta acepta refugiado pa tratado internacional di refugiado, ta obliga pa cumpli cu cierto exigencia. Un di nan ta pa duna hende hospedahe, pa duna nan alimento y co’i bebe, duna nan acceso na servicio di salubridad publico y algun otro asunto.
Fuera di esey mester percura tambe cu nan tin un manera di paga cierto gastonan nan mes, loke ta yama ‘daggeld’. Y si tin mucha envolvi cu ta “leerplichtig” tin di bay scol.
Riba tur esaki, si mira bon, tur tin gasto encera. Awo aki na Aruba nan a opta pa enves di hinca tur refugiado den campo, manera na Corsou nan tabata hinca nan den un sorto di prizon, aki nan ta permiti pa nan ta absorba den cas di hende, etc. Esey no ta kita afo cu pa tur mucha cu ta cay bao di cualificacion di refugiado, tin di bay scol. Nos sa cu cualkier mucha cu ta bay scol mester scupi placa. Awo e pregunta ta, fo’i unda e placa ta bin p’e muchanan refugiado bay scol, pasobra tambe tin di paga schoolgeld, aircogeld, etc.
E contesta ta cu no ta paga nan. Pero ta ricibi pago pa nan. Mescos cu tin famia di refugiado no tin manera pa genera placa via trabao, ta cubri cierto cosnan pa nan. Tin yen di fundacion aki na Aruba, cuminsando pa Cruz Cora, Fundacion pa Nos Comunidad y algun otro mas, cu ta percura pa pakete di cuminda.
Fuera di esey tin yen di servicio cu tin cu ta paga. Ora cu e refugiadonan yega hospital, na Eerste Hulp, obligatoriamente mester yuda nan. E instancia cu ta core cu tur e gastonan cu nan no por cobra, ta hospital. A lo largo, ken lo mester para responsabel pa tur e gastonan aki? Na final di cuenta, e ta cay pa e aseguradonan di AZV, pasobra AZV t’esun cu tin di paga e gastonan na final y e pagadonan di belasting ta paga AZV.
Asina tin yen di gasto cu nos(e pagado di belasting) tin di paga y riba cual, gobierno no kier duna claridad. No ta un organisacion tin, pero ta un hala di organisacion tin cu ta traha riba e tema di refugiado. Tin di nan ta hasta combina, den e caso aki HIAS y Nacionnan Uni, cu ta sinta hunto den un oficina den Arendstraat. Fuera di esey tin un Panamerican Development Foundation cu tambe ta haci trabao pa e refugiadonan Venezolano.
Ademas, p’e Venezolanonan a regla tambe un subsidio pa un Casa del Venezolano, cual ta situa den La Sallestraat y tin un opvang center pa hende homber cu ta refugiado, un scol cu recientemente a converti den un centro di acogida pa refugidado. Ta yen di programa tin pa cual tin subsidio fo’i exterior pa refugiado, pero pa yen di proyecto di asistencia social p’a Arubiano mes, no tin ningun depchi disponibel na Hulanda. E pregunta ta ki mishi Aruba ta number 1 riba lista di mas refugiado pa cada habitante na mundo y con ta posibel cu aki na Aruba si e cos ey no ta causa problema financiero.
Segun Ponson, mester duna cuenta mas pronto posibel pasobra esaki si ta costando e pueblo placa. Ora nos mira cu gobierno aworaki di tur forma ta buscando pa aumenta belasting, e pregunta mester ta, cuanto di e belasting ey ta paga p’e luho pa ta number un riba lista di mundo pa mas refugiado pa cada habitante, na mundo.
Un pregunta riba cual Gobierno mester duna contesta lo mas pronto posibel. Ta derecho di e ciudadano, pagado di belasting, pa haya un contesta.
