E caso di “Vacuna Gate” ta keda cu su misterionan. A trece solamente tres persona dilanti di e grupo di e organisadonan mientras cu esunnan cu a comete soborno, a prefera di duna nan un TOM-zitting pa regla e asunto y no hiba e caso dilanti.
No ta conoci cuanto hende a bay TOM-zitting exactamente. Pero durante tratamento di e caso hues a papia di mas o menos 60 caso y fiscal a papia di 62 caso. Fiscal ta basa su mes riba e cantidad di persona cu a registra den e sistema di esnan vacuna ora cu e oficina tabata cera ainda. Pues ainda tin e grupo cu a registra “tussen door” pero cu tabata dificil pa bay bek y wak cuanto di nan tabata den e wega di cumpra certificado.
Tabatin un grupo di hende cu ta famia di otro, cu a paga y tabatin otro cu no sa con nan a yega den contacto cu Maikel Maduro y Gerald Oliver. Fiscal a haci pregunta diferente biaha, con e hendenan a yega den contacto cu nan. Maduro a bisa cu tabata un persona a acerc’e inicialmente, pero e no tabata conoce y despues e hendenan a cuminsa yam’e.
“Pero e cantidad di e hendenan cu mi a yuda tabata un 5, 6, 7, 8 of 9, pero no mas. Pero cinco so a paga y e otronan no”, Oliver a sigura hues. Ademas el a bisa cu ta cinco 5 nomber so el a yena. “Mi no por para responsabel p’e restonan pasobra ta tur hende tabatin acceso na e laptop.”
Pero fiscal a bis’e cu ta straño cu e so tabata registra e hendenan prome cu oficina habri. Otro empleado interoga a bisa cu ta 8:00 am ta cuminsa atende hende. Pero Oliver ta insisti cu ora e yega trempan e kier acelera e servicio y tin hopi hende ta bin walk-in. Esta cu nan no a haci cita. E ora e ta haci check-in pa nan y check-out tambe, sin check si nan a drenta paden pa tuma e vacuna.
A resulta cu den e lista di esnan cu a haya e bon servicio di Oliver pa registra nan nomber prome cu ora di trabou, ta 62 persona. Pero autoridad no tabatin tempo pa interoga tur e 62 personanan aki, sin menciona e otronan cu nan nomber ta hinca durante ora normal di trabou.
Pero a bisa cu esnan cu a haya vacuna falso, cu no a bisa tampoco cuanto nan ta, a haya e chens pa paga un boet via di un TOM-zitting.
(Nota Red: A cuestiona esaki pa motibo cu e caso aki ta uno cu a pone cara di Aruba na berguensa y tabata merece pa hiba tur hende dilanti y paga pa e delito cometi di soborno. Nan ta mes responsabel pa daña nomber di DVG y Aruba cu e tres acusadonan cu si a hiba dilanti mesa berde.)
Cu e hendenan ta saca placa, ta sigur. Den e combersacionnan cu a haya den celular, a pesar cu Maikel Maduro a kibra su celular cu martiu ora a bay pa deten’e, a saca afo e sumanan cobra. Den corte el a bisa cu el a cobra 250 florin na esunnan cu a pidi e pa haci nan un fabor. Pero den e combersacionnan tabata papia di 350 florin y otro a declara di a paga 300 of 400 florin. Un persona a bisa cu el a paga 200 euro. Pues hasta den corte, Maduro tabata gaña riba loke el a gana cu benta di certificado y unda cu e no por a splica con e hendenan a yega cerca dje y no cerca un di e tantisimo contratistanan cu DVG tabata uza.
E di tres acusado ta Jonathan Ridderstap, primo di Maduro, tambe a admiti di a yuda hinca cinco nomber. Aunke el a bisa cu el a duna Maduro a password di un colega pa yen’e, despues Maduro ta bisa cu ta Ridderstap mes a hinca e nombernan. Un tiramento di culpa riba otro. Si mester kere nan, tin un poco mas cu 15 nomber so cu nan a registra den e sistema di e hendenan cu no kier a vacuna, pero si tabatin mester di nan certificado. A pidi pa Maikel Maduro y Gerald Oliver 18 luna di cual 12 luna ta condicional, 3 aña di prueba, 240 ora di trabou pa comunidad y boet di 2500 florin. Pa Ridderstap, a pidi 22 luna di cual 18 luna ta condicional, trabou pa comunidad y boet. Dia 8 di juli tin sentencia.
