Desde un edad hopi jong Lislaine Bermudez, conoci artisticamente como Avali, tabata sinti un conexion grandi cu arte. Segun e tabata crece el a cuminsa busca pa sa kico realmente e tabata gusta y kico ta hacie contento.
Cu su 15 aña el a cuminsa skirbi poesia, e tabata stima e sentimento di hunga cu palabra cu te dia di awe ta yud’e skirbi su mesun cancionnan. Cu su 20 aña el a cuminsa pinta cuadra, cu a bira un adiccion al instante cu den un tempo relativamente cortico por a wak un mehoransa drastico.
Despues di esey Avali a cuminsa actua den diferente pelicula cortico, video musical te hasta tabata protagonista di un pelicula local cu a hiba como titulo “Natalia.”
Recientemente, na 2021 el a lansa su prome cancion bou di e titulo di “Acercate” cu a bay hopi mas miho di locual e mes a spera.
Mas aleu, Avali a conta cu cantamento ta algo cu e gusta desde cu e ta mucha, pero como e por ta un tiki verlegen den cierto cosnan, e no a pensa cu un dia e lo ta haciendo locual e ta haciendo awor.
INSPIRACION P’E CANTICA
Na Juni 2021 el a sali for di oficina di su psicologo, pensando riba tur locual nan a caba di papia. Den esey, el a puntra su mes; “Kico mas mi a sinti na e momento cu mi ruman a fayece?” El a keda pensa un rato… Y el a responde su mes: “M’a sinti manera mi mama a gaña mi.”
Como un persona hopi creativo y expresivo den arte el a imagina con e lo ta pa skirbi un cantica cu ta describi algo cu kisas hopi di nos a yega di sinti, pero cu ta un topico cu varios di nos kisas ta sinti culpabel pa admiti.
E tabatin e idea ey un siman largo den su cabes, pero niun idea di con pa cuminsa ya cu e tema ey ta uno hopi dificil y doloroso p’e. El a dicidi di djis cuminsa.
Sinta den su oficina, el a cuminsa skirbi, su pen tabata djis bay… El a yora, el a yora un tiki mas y el a finalisa e ‘draft’ di “Mamá Me Engañó” den un solo biaha.
Pa un relato mas amplio, lesa bo matutino digital TREMPAN.
