Jeon, nos orguyo nacional, un biaha mas ta preparando pa bin cu un siguiente proyecto na nivel internacional. Actualmente e ta na Miami, unda cu e ta trahando riba un album nobo riba un nivel mas halto.
Y naturalmente 24ora.com tambe ta na Miami actualmente y a tuma e oportunidad y a combersa cu ne. El a conta nos cu tur cos ta bayendo hopi bon. Esaki ta un album cu el a tuma su tempo riba dje. Tur hende durante dos aña a puntr’e pa algo internacional, algo nobo. Awo t’e momento cu e hendenan ta bay mira un nivel mas halto pa prome biaha di Jeon.
E ta sigui conta cu ta bay saca un album completo y ta bay saca algun videoclip tambe, djis lo bay hacie un tiki mas agresivo cu normal, den e parti di mercadeo. Normalmente ta los un cantica. Pero e biaha aki ta los varios cantica den un solo biaha. Jeon ta sigur cu e fanaticonan lo gusta esaki, despues di basta dia sin scucha algo nobo.
E PROCESO
E album tin varios cantica mas tanto na Spaño, aunke tin algun di nan tambe ta na Papiamento. Jeon ta conta cu na comienso tabata hopi dificil pasobra e no por a papia Spaño.
Ora cu el a bay biba na Miami, el a adapta. E tabatin hopi amigo Cubano. Asina ey el a cuminsa siña papia Spaño. Aworaki e ta hopi mas comodo cu grabamento na Spaño. E album riba su mes a tuma hopi tempo pa grab’e, pasobra e kier a hacie bon. Jeon a percura p’e keda zona manera Jeon y djis cu e idioma ta cambia y bira Spaño. E reto tabata hopi duro na comienso, pero aworaki el a gara e flow. Ya e ta un poco Cubano caba.
E GENERO
For di tempo Jeon tabata un hoben, el a considera su mes como un artista hopi versatil y por canta un poco di tur cos. E album mes ta uno urbano, pero ora scuch’e, por mira e diferencia den cada cantica. Ningun caminda no ta parce otro, pero cada cantica ta uno riba su mes.
ARTISTA INVITA
Lo bay tin hopi sorpresa riba e album aki, segun Jeon. E lo tin artista invitta hopi great tambe. Manera a menciona, esaki a tuma su tempo, cada artista tin su schedule y Jeon ta hopi contento cu e resultado. Practicamente e album ta cla. Na momento cu 24ora.com a papia cu Jeon, el a graba su ultimo cantica.
KI DIA E ALBUM TA SALI
Durante e temporada di zomer, lo bay tin lansamento di e album nobo aki.
DIA DI MAMA
Jeon tambe a graba un cancion cu dia di mama, hunto cu e artista faborito di su mama, kende ta Boy Thode, cual no ta un regalo miho cu esey. Su mama semper tabata fanatico di e artista conoci aki. For di tempo cu Jeon tabata mucha, e tabata scucha Boy Thode den cas. P’e ta un soño cu a realisa, pa graba un cantica di mama hunto cu Boy Thode. E cancion aki lo sali e siman aki. E cancion yama ‘Ma’. Su mama porcierto a scuch’e caba y a gust’e un mundo. E no por a kere cu su yiu a hacie cu Boy Thode. “Mama a keda hopi contento.”
GRABACION DI UN VIDEOCLIP
Jeon a graba un clip di un di e canticanan di e album, cual a bay hopi bon. Edward Silberie a haci e parti di e video y ta un proyecto internacional. E videonan aworaki ta biniendo riba un calidad mas halto, cu un ekipo hopi mas grandi. Nan ta trahando na Miami, p’a por tin un ekipo mas grandi y mas material pa haci loke kier haci aworaki , aunke cu nan a haci algun proyecto na Aruba.
NOMBER DI E ALBUM
E album tin un nomber caba, pero Jeon no kier a divulga e nomber ainda. E nomber ta duna hopi nificacion cu Jeon ta un mucha homber di isla cu no ta Latino ni Spaño. E a un Arubiano cu no ta papia ningun otro idioma sino ta Papiamento. Ta un nomber di Caribe identificando Jeon.
Awo nos mester djis sinta warda, momento cu Jeon lansa su album nobo riba mercado mundial.
