F3 ta: “Functional Fitness Federacion Aruba” un fundacion practicamente nobo cu ya caba a representa Aruba den varios ocasion den competencianan den exterior. Esaki lo ta e di dos biaha cu ta sali pa representa Aruba den Worlds, ya cu e prome biaha tabata na 2018 na Inglatera y e biaha’ki ta na Suecia.
Lo ta participando cu 4 atleta y dos coach. E atletanan ta e conoci Veronique Atenas cu a caba di gana e prome luga na Colombia den Master, hunto cun’e den damas lo bay representa Aruba un atleta cu no ta descononi pa nos y cu ta biba na Hulanda y ta un coach di Crossfit na Hulanda esey ta Kira Bisslik. 
Den masculino nos tin e prome atleta Lionel Koolman tambe un atleta consagra den crossfit, acompaña pa Myron Speyer e promesa den Crossfit pa Aruba kende ta un hoben di 19 aña cu un futuro prometedor den deporte. E competencia lo ta en ekipo y nos lo busca e manera pa prepara atletanan pa den futuro por participa individual.
E coachnan ta William Erasmus y Ronald Speyer. William Erasmus cu ta e Presidente di e Federacion y a wordo invita pa e prome congreso y pa forma parti di e panel den e Congreso Mundial. Aruba como un isla chikito a inscribi di 9 luga y esey ta duna Aruba un puesto privilegia y lo ta un bon ehempel di dedicacion y amor pa deporte.
Pa e aña aki e federacion a bin cu un plan structural unda e seleccion cu e preseleccion forma pa atletanan di tur gym di crossfit manera Eximious Crossfit, Gradum Crossfit y Muscles and Lungs Crossfit ta bin hunto train tur diadomingo cu e intencion di representa Aruba den exterior. E idea ta pa pusha e nivel di atletanan competitivo na Aruba.
E intencion ta di logra clasifica pa participa na un nivel mas halto den e competencianan venidero cu ta e regionalnan y logra un bon resultado. Asina nan lo tin experiencia acumula pa sa con nan ta para dilanti di un competencia mas grandi. E plan ta grandi pa cu e Federacion y pa cu e atletanan cu ta train cu mente competitivo pa nan por logra nan soño y nan lo por participa den competencianan grandi afo y ocupa puestonan halto.
E atletanan cu ta representando Aruba den e mundial aki ta train hopi duro y ta espera nan haya un bon resultado na Suecia. E Federacion ta desea tur clase di exito pa tur e atletanan cu ta participa.
