Kapel di Alto Vista ta e sitio Santo y Sagrado cu Señor a regala nos dushi pais. No tin lugar mas stima cu ta Kapel di Alto Vista na unda hopi milagronan a sosode tanto pa localnan como nos bishitantenan.
Nos ta lamenta cu un compania grandi di telefoon di nos pais cu tur aña ta duna nan contribucion e aña aki a nenga esaki, segun informacion anonimo pa motibo di politica y despues cu un ex politico tin hopi di bisa den e compania y door cu cierto persona ta na cabez di e organisacion, esaki a ser tuma hopi na serio den consideracion. Politica no por ta mescla cu religion, specialmente pa nos Mama stima Maria di Alto Vista.
Ta mescos cu hopi coristanan no ta participa e aña aki den e Coro Nacional, mester tuma na consideracion cu no ta pa Parokia di Noord boso ta canta, pero pa Nos Mama stima. En todo caso esnan cu si a presenta y hopi cu no ta pertenece sikiera na un coro lo percura pa Mama Maria Su dia lo ta bunita y grandi e aña aki atrobe.
E programa di e Nobena Nacional ta lo siguiente:
28 september parokia di Noord, 29 september parokia di Savaneta, 30 september Paradera, 1 di october parokia di Tanki Leendert, 2 di october parokia di Dakota, 3 di october parokia di Brazil, 4 di october Paorkia di San Nicolas, sigui pa adoracion Nacional cu presencia di Satisma, 5 di october parokia di Oranjestad, 6 di october parokia di Santa Cruz y dia 7 tur Parokia fiesta Patronal Mama Maria di Alto Vista.
E nobena Nacional ta tuma lugar tur dia na Kapel di Alto Vista mes y ta cuminsa pa 5:30’or di atardi, sigui pa Santo Sacrificio di misa canta.
Vigilia despues di misa di dia 6 di october:
7:30’or – 8:30’or Santa Cruz, San Nicolas y Brazil
8:30’or – 9:30’or Savaneta y Paradera
9:30’or – 10:30’or Tanki Leendert, Oranjestad
10:30’or – 11:30’or Dakota y Noord
Tur fielnan ta ser pidi pa uni forza y duna Nos Mama Santisima Virgen Mama Maria di Alto Vista, Patrona di nos pais, un bunita homenahe.
