Fundashon Passionistas ta organisá e di ocho edishon di Passsionistas Pop-Up Fair riba dia 3 di mart. En kolaborason ku Fundashon Birgen di Rosario ta duna atenshon speshal na grandinan na e feria. E evento lo tumá lugá entre 15:30 pa 20:30 na Hòfi Wayaká ku ta situá na Weg naar Welgelegen 64.
Fundashon Passionistas tin e meta pa stimulá ‘entrepreneurship’ i duna atenshon na diferente tópikonan sosial. Fundashon Birgen di Rosario lo ta presente na e feria pa duna informashon tokante e servisionan ku nan ta ofresé na grandinan. E fundashon ta bai bende produktonan pa generá fondo. Passionistas lo krea espasio pa klientenan di Fundashon Birgen di Rosario tambe disfrutá dje aktividatnan. Yrzah Eisden ta lansá su proyekto ‘We Art One’ na e Passsionistas Pop-Up Fair, kaminda tur siman e ta duna lès di pinta na grandinan di Fundashon Birgen di Rosario.
Apesar di esei, durante e feria empresarionan i hòbiista lo bende diferente produktonan artesano, obra di man, kuminda i kos di bebe. Pa muchanan lo bai tin un workshop kreativo i duo Los Dos ta bai toka müzik karibense. Le Atelier ta presentá un ‘fashion showcase’ di asesorionan. JenPenCreative Studio i Blue 33 Woodworks tambe ta duna un workshop kreativo pa adulto.
Durante e workshop hende ta siña traha nan mes stul i mesa di palu. Registrashon pa e workshop ta posibel dor di manda un email na [email protected]. Entrada dje feria ta Naf 5 pa adulto i grátis pa muchanan te ku 12 aña.
Fundashon Passionistas ta organisá eventonan i partisipá na proyektonan ku ta ofresé personanan kreativo i ku pashon pa nan talento un plataforma i e posibilidat pa ‘netwerk’ i kolaborá. Pa mas informashon tokante e filosofia di Fundashon Passionistas, detaye di e feria i pa un impreshon di e otro edishonnan, por bishitá e página di Facebook: www.facebook.com/passionistascommunity. Òf por yama e number di telefòn 517-6513 i manda un imeil na [email protected].
